Ariana Grande leh a pasal Dalton Gomez an inthen

Ariana Grande leh a pasal Dalton Gomez an inthen
Ariana Grande leh a pasal Dalton Gomez te chu kum hnih an inneih hnuah thenna biahthu an inhlan ve leh ta tlat mai. TMZ-in a tarlan danin Grande leh Gomez te hi kumin January atang khan an lo awm hrang tan tawh a, tunah chuan dan ang taka inthen fel law law tumin hma an la ta a ni.
Grande hi tunah hian UK-ah ‘Wicked’ movies shooting neiin a awm mek a,July ni 16 khan Wimbledon te pawh a en a, hetah hian an inneih zungbun a bun tawh lo. He tennis championship a en lai thlalakah chuan Andrew Garfield, Tom Hiddleston leh ‘Wicked’-a a chanpui Jonathan Bailey te nen an thu hoin, inneih zungbun a bun thinna kut zungtang chu a ruak tawh tlat.
Luxury real estate broker Dalton Gomez leh Grande te hi February 2020 atangin mipui hriatin an inzui tan a, December 2020-ah an inhual a, May 2021-ah an innei zui ta a ni. Dalton Gomez hi Grande leh Justin Bieber ten COVID-19 hripui len vanglaia music video an tihchhuah ‘Stuck With U’-ah pawh a lang ve nghe nghe a ni.
Tuna inthen an tintuah hma hian an inkar siamthat tumin hma te an la viau nain an hlawhtling ta lo a, TMZ chuan Grande leh Gomez te hi an la inthiantha zui reng tho a, phone-ah pawh an la inbe regu tho niin a tarlang bawk.
Ariana Grande sawi takah chuan a music video ‘Into You’ chuan YouTube-ah vawi tluklehdingawn en a hlawh ta. He video hi 2016-a a tihchhuah kha niin, kum sarih hnuah vawi tluklehdingawn en a hlawh thei ta a ni.
He hla hi 2016-a a album ‘Dangerous Woman’ atanga a single niin, a tlangzarh hlimah Billboard Hot 100-ah No.13 a kai a ni. Grande hian Hot 100 chart-a a lang thei hla 73 a nei tawh a, chung zinga hla 20 chu top 10-ah langin, No.1 a lang thei hla pasarih a nei tawh bawk.