Arjuna Award dawng tur Siami lawmpuitu an tam

Arjuna Award dawng tur Siami lawmpuitu an tam
India rama infiammite chawimawina ngaihhlut hlawh dawng tura thlan chhuah Lalremsiami Hmar chuan a chipuite lawmpuina a dawng nasa hle a, chu’ng zinga langsar ber Mizoram chief minister Lalduhawma chuan soial media-ah heti hian lawmpuina thuziak tarlangin, a thlalak a dah chhuak tel bawk:
“Mizo nula Lalremsiami, India International Hockey player chu India ram pumpuia infiammite chawimawina sang ber dawttu Arjuna Award 2025 dawng tura thlan a nih thu Ministry of Youth Affairs and Sports chuan August ni 18, 2026 khan a puang a.
“Lalremsiami hi Mizo nula Olympian kan neih chhun a ni a, India ram tan hlawhtlinna tam tak a lo chang tawh a, h chawimawina ropui tak pawh hi Mizo zinga a dawng thei hmasaber a ni dawn a ni.
“Lawmpuina ka hlan a, ka chhuang em em a ni,” tiin.
Sports minister Lalnghinglova Hmar pawhin Arjuna Award dawng tur zinga Mizoram mai ni lo India ram tihmingthatu Mizo nula Lalremsiami a tel chu a lawmpui tih sawi chungin thinlung taka a chhuan thu leh tumruhna, inpekna leh thawhrimna nen dinhmun sang zawk thleng zel turin duhsakna a hlan ve bawk.
Mizoram Olympian Lalremsiami Hmar chuan Mizoram infiamna huangah history thar siamin Indian hockey tana a thawhhlawkna chuan Mizo infiammite zinga national sporting award dawng thei hmasaber dinhmunah a hlangkai ta a ni.
Ministry of Youth Affairs and Sports chuan Lalremsiami bakah Indian hockey player dang Rajkumar Pal chu Arjuna Award dawng tur mi 17 a thlanchhuah zingah a telh a; he award hi Rashtrapati Bhavan-a ceremony-ah President of India ngeiin a hlan dawn ta a ni.
Kolasib nula Siami hian kum 2017 khan a senior international debut a nghahchhuah hnuah hawikir leh tawh loin Indian women’s hockey team peng pawimawh vawiin thlengin a ni chho ta zel a; Tokyo 2020 Olympics-ah khan a team chu semi-final luhpuiin, palina an ni.
A international career-ah hmeichhe tournament pawimawh chu a khel kim a ni tawh a, World Cup bakah Asian Games leh Asian Champions Trophy pawh India tan chuh tawhin, 2018 Asian Games-a silver medal latu Indian team-ah a tel a, kum 2022 Asian Games-ah bronze a lakpui.
Kum 2023 leh 2024 khan a zawnin India chu Asian Champions Trophy title a lakpui bawk.
He’ng lo major international tournament dangah pawh Lalremsiami hian India chu hlawhtlinna chanpui tawhin, chu’ng zingah chuan 2017 Women’s Asia Cup leh FIH Hockey Nations Cup a tel.
Kum 2019 khan a pa Lalthansanga Zote chu lungphu chawlin a thi thut mai a, chutih lai chu FIH Women’s Series Finals khela Siami chhuahbo hlan niin, semi-final inkhel pawimawh taka Chile an hmachhawn hma ni chiah a ni nghe nghe.
Tah chuan, chutih laia tleirawl kum 19 mi lek Siami ropuizia leh pachanzia, India tana a inpekna thukzia a lo lang a, an in lama lusun chhungkua an nih laiin haw loa inkhelh tlang a thlang a, Chile lakah a ram chu chakpuiin, final-ah pawh an chak zui leh a, FIH Women’s Series Finals title la chungin Olympic qualifiers-ah an tlang phah zui ta nghe nghe a nih kha.
Kha mi tuma a title hlawhchhuah kha a pa tan a hlan a, India sawrkar chuan a huaisenna leh ram tana a inhlanna hre rengin infiammite chawimawina dawn theih sang ber dawttu Arjuna Award dawng turin a thlang ta a ni.
He chawimawina hian bronze hmanga siam Arjuna lem (bronze statuette of Arjuna) bakah certificate leh tangka fai Rs. 15,00,000 a keng tel.
Infiamna huanga chawimawina sangf ber chu Major Dhyan Chand Khel Ratna Award a ni.
Award lawmna goal khungtu Siami
Nizan khan FIH Women’s Hockey World Cup khelh mekah Lalremsiami hian goal khung chungin India chu South Africa lakah 6-1 hnehna chanpuiin, an bultanna inkhelah China nen inhnehtawk mah se Round 2 lut turin India nulate dinhmun a tha leh ta sawt.
Indian women’s hockey team hian an Pool D match hnihnaah African team hi an tham lo hle a, goal difference-a an san awkna hian buk ngai dinhmunah lo ding pawh ni se an hamthatpui thei tura ngaih a ni.
South Africa laka India goal ruk hi player hrang thiau paruk tihluh niin, India tana goal thawhtute chu Sunelita Toppo (11th minute), Navneet Kaur (17th), Sushila Chanu (25th), Deepika (38th), Lalremsiami (44th) leh Sakshi Rana (45th)-te an ni.
Vawiina India tum leh tur hi team khawng zawk England niin, India coach Sjoerd Marijne chuan South Africa game aia tha English-ho laka lantir turin a naute a fuih sauh sauh.
He tournament-ah hian Marijne squad-ah World Cup debutant 11 zet awmin, chu’ng mite leh player tawnhriat ngah tawhte an inpawlh a; India team-ah hian Mizo player dang Lalthantluangi a tel ve bawk.
Ti hian, khelh hnihah India leh China chuan point li ve ve neiin, goal difference-a sang zawk India chuan he thu buatsaih lai thleng hian an pool-ah hma an hruai ta a, vawi khat chaka vawi khat tlawm tawh England chuan an hmahruaina hlohin, point thum nen pathumnaah an chhuk ve thung.