Arsenal an chak awlsam

Arsenal an chak awlsam
Pathianni zan FA Cup fourth Round khelh chhunzawm a ni a, Champion tura rinkai zinga Arsenal chuan an mualah awlsam takin hnehna an chang a, fith round an inhlangkai. Arsenal rual hian EPL table mawngphaha awm Wolves pawhin hnehna an chang ve bawk.
EPL hmahruai Arsenal hian an mualah Championship club Wingan Athletics an mikhual. Chak tura rinkai zawk an nih ang ngeiin an khel tha viau a, minute 17 chhung leka goal li an thun hmangin an chak a, awlsam takin fifth round an inhlangkai.
Arsenal hian an mikhualte an ngam viau a, fuh taka ball an inpek kual hnuin Eze chuan ball fing leh tha zet mai a pechhuak. Eze ball pek atang hian Noni Madueke chuan minute 11 na lekah awlsam takin a pet goal a, hmahruaina goal a thun. Hma takah goal an thun vangin Gunners an phur a, inrintawkna sang zawk nen an inlan chhunzawm. Eze chuan ball fing a pechhuak nawn leh a, Gabriel Martinelli chuan minute 18 naah Jack Hunt an goal hnihna a thun zui leh a, an hmahruaina a tizau.
Inhnaihchilh taka goal hnih an chhuah vangin Wigan an buai leh zual a, vanduaithlak takin goal an chhuah belh leh. Minute 23 na lekah Jack Hunt chuan an lamah a ti goal a, Arsenal goal thumna a thunsak. Goal thum zeta hma an hruai hnuin Gabriel Jesus chuan minute 27 naah inringtawk zetin a pet goal a, an goal lina a thun. Arsenal hian minute 17 chhung leka goal li an thun hmangin 4-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Arsenal in goal an thun belh teuh thei hle. Na takin an khingpuite nawr bawk mah se goal an thun belh thei tawh lo. Goal thun belh lo mah se nuamsa pangngai takin hnehna an chang tho thung a, fifth round an inhlangkai zui ta a ni.
Wolves an chak nawlh
Pathianni zana inkhel dangah EPL a table hnuai ber luahtu Wolves chuan team lian lo hneh chho tawh Grimsby Town chu an mualah ngei an va hneh a, fith round an inhlangkai ve bawk.
Grimsby Town leh an mikhual Wolves te hi an inhnehtawk viau a, goal pawh a lut har hle. Hun rei tak chhung goal lut a awm theih loh hnuin mikhual team Wolves tan Santiago Bueno chuan minute 60 naah hmahruaina goal a thun ta nawlh. Beuno goal thun hi hun tawp thlengin an venghim a, hnehna hlu tak changin round sang zawk an inhlangkai zui ta a ni.
Fulham in Stoke an leh thal
Pathianni zana inkhel dangah EPL club Fulham in mualpho an pumpelh a, si an phurh hmasak zet hnunin hnehna an chang let a, fifth round an inhlangkai.
Championship club Stoke City tan hian Bae Jun-Ho chuan minute 19 na lekah hruaina goal a thun a, EPL club an barakhaih. He goal hmang hian hun rei tak chhung hma an hruai a, hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Fulham in an khel tha ta viau. Na taka an khingpuite nawrin goal pawh an thun ta thuai. Minute 55 na lekah Kevin chuan goal thunin an si phurh a sut. Hun rei tak chhung goal a luh belh theih loh hnuin Harrison Reed chuan minute 84 naah hma an hruai letna goal a thun ta nge nge. Reed goal thun hi Stoke City in hun tawp thlengin an sut thei tawh lova, an mualah uiawm takin an tlawm zui ta a ni.
Leeds an tlang hram
Fulham ang thoin EPL club Leeds United in mualpho an pumpelh a, Birmingham City lakah hnehna an chang ve hram bawk.
Leeds United hian mikhual an nihna hmunah goal an thun hmasa a, minute 49 naah Lukas Nmecha chuan hmahruaina goal a thun. Hun rei tak chhung hma an hruai hnuin Birmingham City tan
Patrick Roberts chuan minute 89 naah goal thunin an si phurh a sut. Roberts goal thun hnu hian goal dang a luh belh thei tawh lo.
Hun pangngaiah 1-1 a an inhnehtawk vangin penalty shoot out hmangin chak zawk zawn a ni a. Leeds United hian 4-2 a hnehna chang hramin mualpho an pumpelh a, fifth round an inhlangkai zui ta a ni.
Pathianni zana inkhel dangah Sunderland chuan minute 32 naa Habib Diarra penalty pet goal hmangin Oxford City an hneh a, round sang zawk an inhlangkai ve bawk.