Arsenal chak laiin United chak zo lo

March 12, Pathianni zan khan English Premier 2022-23 khelh chhunzawm a ni a. Hmahruaitu Arsenal chuan Mimualah si thum faiin hnehna an chang a, point ngain hma an hruai fal zui nawn leh. Arsenal in awlsam taka hnehna an chan lai hian Manchester United chu an mikhual Southampton lakah an chak zo lo thung.
Laipui a puak tha
EPL season kal mekah beisei phak baka khel tha leh tlo Arsenal hi Fuham hmachhawn turin Craven Cottage-ah an lenglut a. Inrinni zanah an hnuai chiaha awm Manchester City an chak vangin Gunners hian Fulham hneh ngei an mamawh. Hun pawimawhah an chet sual khut a hlauhawm viau laiin Mikel Arteta team ten Mimualah an khel tha ta viau thung a, chawlhlawk hmain laipui vawi thum ngawt an tipuak hman a. Chawlhlawk hmaa an goal thun pathumte hi an chakpui zui ta bawk.
Craven Cottage-ah Arsenal hi ngampa takin an inlan a, goal pawh an thun har lo. Minute 21-naah Leandro Trossard corner pet tha tak chu defender Grabiel chuan hnaite atangin a tauh goal a, hmahruaina goal a thun. Hma takah goal an thun hian Arsenal hi pressure tam tak ata a ti zalen a, zalen zawkin Fulham lakah an inlan zui theih phah.
Hmahruaina goal an thun hnuah inrintawkna sang zawk nena inlan Gunners hian goal an thun belh leh thuai. Minute 26-naah Gabriel Martinelli chuan Leandro Trossard siamsak tha tak chu awlsam takin a tauh goal a, an goal hnihna a thun. An goal hnihna thun tura Arsenal ball inpekual leh an khingpuite an nawr tlang zui hi a pui hle. An goal bul atangin an khingpuite an nawr let a, fuh zeta nawr tlangin, goal an thun zui ta hial a ni.
Thlasik bazarah Trossard an lak luh hnuin Arsenal manager Mikel Arteta chuan Brazilian rawlthar Martinelli hi striker angin a chhawr tam a, a tisual lo hle. Martinelli hian goal a thun ta fo a, team tan tangkai zawkin a inlan. Martinelli goal thun hnu hian goal a luh belh lawk thei lova, chawlhlawk dawn hnaihah laipui a puak nawn leh ta thung.
Chawlhlawk dawn tep minute 45+2-ah goal hnih siamchhuak tawh Trossard chuan fuh zetin ball a vawrh lut a. Captain Martin Ødegaard-a’n box chhungah ball a dawn hnuin fuh leh tha zetin a khalh kual phawt a, chiang zeta pet goal in an goal thumna a thun. Martin Ødegaard goal thun hian an hmahruaina a tizau leh zual a, si thum faia hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, mualneitu Fulham in goal thun tur khawpin an nawr tlang thei lo. Gunners hian hun tha dang nei bawk mah se goal dang an thun belh thei lo. Goal dang thun belh thei lo mah se si thum faia chakin, an mamawh point thum an hmu tho thung.
Fulham lakah si thum fai ngawta an chak hi Arsenal tan chanchin lawmawm a ni a. Mual chhungah hliam vanga chawk reng Garbriel Jesus hmuh tur a awm leh ta kha Arsenal lawmna tithuah hnihtu a tling bawk. Brazil tan a fehchhuahna lama hliam tuar Jesus hian minute 77-naah mualchhung lutin Fulham a hmachhawn a, a khel chhe lo viau nghe nghe. Champion tuma inumna boruak a nun chhoh laia player tawnhriat ngah chhawr tur an neih belh leh ta hi manager Arteta tan pawh thawk huaina tham a tling ngei ang.
Arsenal manager Mikel Arteta chuan Man-chetser City atanga an lak Gabriel Jesus hi chhawr nghal tluk tluk erawh a tum hran lo thung. Khelhna hmun chang turin a suala a sualchhuah ve ngei a ngaih tur thu a sawi a. Duhthlan tur an ngah ve tak vangin tutan mah hmun him a awm ngawt loh thu Arteta hian sawiin, Gabriel Jesus ngei pawh hian hmun chang tura thawhrim a mamawh thu a sawi.
United an chak zo lo
Arsenal in Mimualah awlsam taka hnehna an chan laiin team lian dang Manchester United erawh chuan Old Trafford-a an mikhual table mawngphaha awm mek Southampton lakah hnehna an chang zo lo ve thung. United hi hmahruaitu Arsenal lakah point 16 zetin an hniam tawh a. Champion turin Arsenal leh Manchester City an lehpelh rual a ngaih bawk si vangin United hi champion tura inel zingah an tel tawh lo ang hialin a ngaih theih.
Old Trafford-ah Manchester United hian an khel chhe lo viau a, point thum hmuh ngei tumin an mualah tan an khawh. An mualah khel chhe lem lo viau mah se goal an thun thei lawk lova, chawlhlawk dawn hnaih minute 34-naah Casemiro hnawhchhuah a ni zui leh ta zel a, kim lo zawk an nih vangin an mualah ngei an tlawm phah zui teuh hle.
United midfielder pawimawh Casemiro hian Real Madrid atanga United a zawm hnuin EPL-a red card vawi hnih a hmu der tawh. Fulham lakah direct red card a hmuh leh tak vangin Casemiro hi game li chhung khel thei lo turin hrem a ni a. Top four inchuh boruak hot vanglaia player pawimawh an chhawr thei lo tur hian United tan nghawng pawi nei thei dinhmunah an ding.
Chawlhlawk hnu lamah goal thun tumin team hnihte an innawr tawn nasa viau a, goal thun theihna hun tha an hlah ve ve a, goal post leh goal bar per tum li ngawt a awm nghe nghe. United tan Bruno Fernandes chuan goal a thun teuh hle a, vanneihthlak takin Saints si nghakin a lo dang a, goal post in table mawngphah hi a chhan leh hlauh bawk. Southampton hian table mawngphah chhuahsan ngei tumin tan an khawh a, goal thun theihna hun tha bik tum li ngawt an hlah a, Theo Walcott pet goal loh kha an la ui vawng vawng ngei ang. Chutiang bawkin Marcus Rashford penalty hlawhchhuah loh kha United pawhin an ui zui hle ngei ang. Fulham an hmachhawn tum hian United rawlthar duhawm Ganarcho chuan hliam a tuar a, Argentina rawlthar duhawm hi engtia rei nge a chawlh ngai dawn a la hriat loh.
Newcastle an chak
Pathianni zana inkhel dangah Newcastle United chuan St James Park-a an mikhual Wolves chu 2-1 in an hneh a, top 4 huang luah phak beiseina an nei thar leh.
Newcastle tan hian Alexander Isak leh Miguel Almirón ten goal an thun a. Wolves goal neih chhun hi Hwang Hee-Chan thun a ni ve thung.