Arsenal in Declan Rice an dawr nawn leh

Premier League club lian Arsenal chuan West Ham United captain Declan Rice an dawr nawn leh a, Rice manah hian £105m zet an tawktarh a, la thei tawh ngei tura ngaih an ni.
Arsenal manager Mikel Arteta chuan Declan Rice hi an muallai thuam chak turin a duh viau a, Emirates stadium-ah hruai luh ngei a duh hle. Gunners hian Rice lak tumin tumhnih ngawt West Ham hi an lo dawr tawh a, hnar an ni ve ve. Gunners in tum hnih an dawr hlawhchham hnuin Premier League champion Manchester City chuan Rice lak tumin hma an la ve leh nghal chat. Treble champion City hian Rice manah Arsenal aiin sum an seng tam huam zawk a, £90m a tawktarh. Treble champion meuhin an dawr vangin Arsenal hi an hlauthawng hman viau a, midfielder lak tur dang an lo melh hman. Hlauthawng ru taka an awm laiin West Ham chuan City dawrna hi an lo hnar ve leh hlauh thung.
Europa Conference League champion West Ham hian an captain Declan Rice hi £100m an chhiar a, Arsenal leh City an hnar danah hian an chhiarna aia tlawm chuan hralh an tum lo bur tih a hriat theih. An chhiarna zat an tawlh hniam duh miau loh vangin Arsenal chuan £105m in an dawr thar leh ta nge nge a, inremna nan nei thei ngei tawh tura ngaih a ni. Arsenal hian Rice manah hian £100m pek phawt a, £5m pek belh leh an tum. Arsenal hian hetiang zat senga an lut thei a nih chuan Rice hi British player manto ber a thar a ni ang a, Jack Grealish record a khum ang. West Ham in an chhiarna zat aia tam maha Arsenal in an dawr tak vangin Rice lak tum ve dang Manchester City chuan Hammers hi dawr nawn an tum tawh lo niin tarlan a ni.
West Ham leh England midfielder pawimawh Rice hian London-ah cham chhunzawm zel a duh a, Manchester-a pem ngai tura Manchester City zawm ai chuan Arsenal zawm a thlang zawk. Amah berin Arsenal zawm a duh vangin lak tuma hel ve tu Bayern Munich chu an lo inhnukdawk tawh a. City pawh an inhnukdawk zui leh dawn niin tarlan a ni.
Season thara EPL leh champions league-ah khawng taka inlan turin Arsenal hian an squad thuamchak an tum viau a. Chelsea forward Kai Havertz an la fel thei tep tawh a. Ajax defender Jurrien Timber pawh an la fel thei tep tawh niin tarlan a ni bawk. Rice lak nan sum hlawm lian sen an huam tak vangin Hammers nen an inrem thuai tura ngaih a ni a. Rice kawppui turin Romeo Lavia pawh Southampton atangin lak ngei an tum viau bawk. Heng player palite hi an la thei a nih chuan season tharah an thatpui ngeiin a rinawm. Gunners hian EPL leh UCL-ah champion an tum ang.