Arsenal in Rice an la lut

English Premier League club lian Arsenal chuan midfielder thar an nei a, West Ham leh England midfielder Decland Rice chu kum nga daih contract ziahpuiin an la lut. Arsenal manager Mikel Arteta chuan an midfielder thar Rice chu Pattrick Vieira thar tur a nih thu a sawi.
Season liam ta EPL-ah uiawm taka champion zo lo Arsenal hian an squad thuam chak turin Declan Rice hi an awt viau a, nipui bazar inhawn chhunga player lak an tum ber atan an hual nghal. Nipui bazar inhawn rualin Rice lak tumin West Ham an dawr nghal a, an hlawhtling mai lo. Lak tuma vawi hnih an dawr hlawhchham hnuin EPL champion Manchester City in Ricce lak tumin hma an la zui ve leh. City in lak tuma an dawr vangin Arsenal in Rice hi an chan loh mai an hlau hman viau. City dawrna hi West Ham in an lo hnar leh hlauh a, Arsenal in an dawr zui leh nghal chat. Hlawhtlin ngei tuma dawr nawn leh an ni bawk a, West Ham nen Rice manah an inrem thei ta nge nge.
Arsenal leh West Ham te Declan Rice mana an inremna hi £105m a ni a, hei hi British transfer record a ni. Arsenal hian Hammers hnenah hian £100m an pe phawt ang a. Beisei anga a khel tha a nih chuan £5m an pek belh leh ang. Man leh mualah inremna an nei fel vek tawh a, Rice leh Arsenal in mimal inremna an neih fel hnu, Rice ngei pawhin medical a paltlang vek tawh hnuah Gunners hian an la lut mai lo. Arsenal in Rice an la lut mai lo hian bazarnaa West Ham chet phung a tihkhaihlak vangin Arsenal lakah lungni lo hman hle. Arsenal demna tawngkam an chhakchhuah hnuah inrinni khan Arsenal chuan Declan Rice chu an la lut fel ta nge nge a ni.
London club lian Arsenal chuan Rice hi kum nga daih contract an ziahpui a, kum khat dang contract pawhsei leh theihna thu thlung an dah tel bawk. Arsenal manager Mikel Arteta chuan an midfielder thar Rice chu an player pawimawh tak la ni tur a nih thu a sawi a. Kum 24 mi hi an captain hlui PatrickVieira thar ni tur ang hiala a ngaih thu a sawi. Patrick Vieira chhuah hnuin Arsenal hian a hmunruak luah zo khawp midfielder tha an hmu zo tawh lo. Britih player manto ber ni tura an lak luh Rice hi Vieira hmunruak luah zo ber tura ngaih a ni.
Arsenal midfielder thar Rice chuan West Ham chhuahsan tura thutlukna siam chu harsa a tih thu a sawi a. Club lian zawkah chona thar hmachhawn a mamawh si vanga Arsenal pan a nih thu a sawi a. A club thar Arsenal chu EPL leh Champions League-ah pawh champion thei tura theihna nei tha nia a ngaih thu a sawi tel bawk. Rice hian West Ham United tan a khelh chhungin inelna hrang hrangah vawi 245 a khel a, goal 15 a thun tawh. England tan vawi 41 a khel tawh a, World Cup 2022-ah khan England match zawng zawngah a khel kim vek nghe nghe.
Champions League khel tur Arsenal hi season tharah tha zawka inlan turin an inbuatsaih nasa hle a, Declan Rice an lak luh hma hian Chelsea atangin Germany forward Kai Havertz an la lut tawh a. Netherlands leh Ajax defender Jurrien Timber an la lut thuai dawn bawk. Rice leh Havertz an lak luh lai hian Granit Xhaka chu Bayern Leverkusen-ah an hralh a, am midfielder Thomas Partey pawh chhuak ngei tura ngaih a ni mek bawk.