Wimbledon lal thar Alcaraz

July 16, Pathianni zan khan Wimbledon mipa final khelh a ni a. Inkhel hmuhnawm takah World No. 1 Carlos Alcaraz chuan champion lai Noval Djokovic a hneh a, ropui takin a champion. Wimbledon lal thar chu Carlos Alcaraz a ni.
Final ngaihven hlawh takah hian champion lai leh champion nawn leh tura rinkai Novak Djokovic-a’n tha chungchuang takin bul a tan a, set khatna tirah break a nei zawn nghal. Break a neih zawn a chhawr tangkai a, game khat chiah a hloh a, awlsam fahranin set a la.
Set khatnaah a khingpui khan lo viau mahse set hnihnaah Alcaraz a insiamtha a, Djokovic a serve a break nghal. Chhe takin bul tan mahse Djokovic a insiamtha thuai a, a khingpui a break let leh nghal. Vawi khat ve ve break an neih hnuin an inhnehtawk zui hle a, game an inlak chhawk zak zak. Break an neih theih tak loh vangin tiebreak khelh zui a ngai. Tie-break ah Djokovic-an bul tan tha in, set point nei hman mah se a chhawr tangkai zo lova, a serve a hum zawh loh zui vangin set a hloh. Set la tura minute 85 zet an inbeih hnuah kum naupang zawk Alcaraz a dingchang a, set a la.
Set thumnaah Djokovic-an chhe takin bul a tan nawn leh a, a serve hmasa ber a hum zo lo nghal pang. A khingpui break let theihna hun remchang tha tak nei bawk mahse hun pawimawh a chetsual fo vangin a break let thei lo. Khelh tha zawk Alcaraz-an break nawn leh ngei tumin a khingpui a nawr a, a hmuhnawm vet vet hle. Duece vawi 14 zet an neih a, game lak theihna hun remchang an hlah dun zak zak hnuah Alcaraz chu dingchang zawkah a ?ang nawn leh a, pui zet maiin break a nei nawn leh. Game rei leh hautak tak an khelh hnuin Alcaraz a chungnung zui a, a serve a hum hnuah awlsam taka break nei lehin set thumnaah game khat chiah a hloh a, set a la nawn leh.
An khel rei tawlh tawlh a, Alcaraz a khel tha tawlh tawlh. Djokovic service a na lova, hun rally rei deuhah tisual hmasaah a tang fo bawk. Ropui leh zual turin a laka pressure tam lutuk a zo lo niin a lang a, ni danga a khelh thin dan a phak lo. Mi dang a sawp chauh mai thin angin Alcaraz hi a chau duh mai bik si lova, amah chau zawkah a tang ve ta tlat thung.
Set hnih hloh zawn a, dinhmun chhe takah ding a, hnual taka a awm laiin set linaah Djokovic chang a parh thar leh. Set linaa khel tha tak Djokovic hian game a thunun chho a, break a neih zawng chhawr tangkaiin set a la ve leh ta mai a. Champion beiseina a chawk nung thar leh.
Set nganaah Djokovic-an beiseiawm takin bul a tan a. Break theihna remchang nei hmasa zawkah atang a, uiawm takin a hlah vangin a hun tha a hlah. Djokovic-an a nawr luatah Alcaraz zawkin Break a nei ta hlauh zawk. Djokovic hian break let tumin theihtawp chhuah mah se hun tha a nei ta ngang lo. Ti chuan, inkhel hmuhnawm tak chu 1-6, 7-6 (8-6), 6-1, 3-6, 6-4 in a tawp a. Carlos Alcaraz chu Wimbledon lal thar a ni ta a ni.
Alcaraz hi thahrui ngah leh tlo tak a ni bawk a, set nga khelh ngaiah record a nei tha hle. Vawi riat zet set nga khelhna match a hmachhawn tawhah vawi khat chiah tlawm zawkah a tang a, set nga khelha a hneh loh awmchhun chu Motteo Berretti niin, Australian Open ah a hneh lo. US Open ah champion a, World No. 1 a ni zui ta Alcaraz hi World No. 1 ni thei naupang ber a lo ni tawh a.
Centre Court ah kum 9 zet tlawm nei lova kal tluang tawh leh he inelnaa vawi li ngawt champion zawn tawh Djokovic a hneh leh nawlh bawk a. A kum a la naupang bawk nen a inhliamte a nih leh loh chuan khawvelin Tennis player ropui tia a chhinchhiah zingah a la tel ngei a rinawm. Player ropui pathum; Roger Federer, Rafael Nadal leh Novak Djokovic te vanglai tak tak a nang hman lo hlauh bawk nen player ropui tak hnih theihna hun tha leh zual a nei. Grand Slam-a vawi 22 champion tawh Nadal a chawl hnai tawh a. Djokovic pawh uai thla lam a lo ni tawh bawk nen Alcaraz champion lai kan hmuh fo a rinawm.
Final hmuhnawm takah uiawm takin champion zo ta lo mahse Djokovic hian rahbi tuk belh thar pa hnih a nei. Grand Slam semi-final vawi 46 khel tawhin, Grand Slam a semi-final lut ngun ber Roger Federer record a nih rual. Federer reciord a nih rual bakah hian Grand Slam final a khelh vawi 35 khel tawhin mipa leh hmeichhe zingah final khel ngun ber record thar a siam. Record thar siam nei bawk mah se record ding lai pahnih nihrual a tumna erawh a puitlin zo bik lo. Record a nih rual theih tak lohte hi Wimbledon a Roger Federer champion zat vawi riat leh Grand Slam a champion ngun ber Margaret Court champion zat vawi 24 te an ni.