Meobourne Park ah Austrlian Open 2023 khelh chhunzawm zel a ni a. Thawhtan tlaia fourth round khelhah hliamin a tihbuai Novak Djokovic chuan hliam tuar chungin Alex de Minaur a hmachhawn a, tualchhung tlangval Minaur lakah awlsam taka chakin, quarter-final a lut. Inkhel dangah Andrey Rublev leh Ben Shelton ten hnehna changin, quarter-final an lut ve bawk.
Mal hliamin a tihbuai Novak Djokovic hi Alex de Minaur lakah tha takin a inlan a, a hliam a ziaawm tawh tih a chet vel dan atangin a hriat theih bawk. Tualchhung tlangval lakah hian tha takin bul a tan a, set khatnaah game hnih chiah hlohin set a la nghal. Set hnihnaah a khel tha leh zual a, a khingpui break zawnin game khat chiah a hloh a, awlsam zual zawkin set hnihna a la.
-- Advertisement --
Set hnih a hloh zawn hnuin Minaur hian insiamthat ngei tumin tan a khawh nang a, Australian Open a vawikua zet champion tawh lakah hma a sawn tak tak thei chuang lo. Set thumnaa pawh a serve a hum zo nawn leh a, game hnih bak la thei lovin set a hloh nawn leh. Grand Slam a vawi 21 champion tawh Novak Djokovic chuan 6-2 6-1 6-2 a hnehna changin qurater-final a lut a, Andrey Rublev nen an inhma-chhawn zui leh ang.
Novak Djokovic laka fiahna hautak hmachhawn tur Rublev hi quarter-final lut zo lovin a tla teuh hle a. Denmark rawlthar Holger Rune lakah vanneih-thlak takin tlawm a pumpelh theih hlauh. Rublev hian Rune lakah set khatna leh set thumna a la, set hnihna leh set lina a hloh thung. Set hnih ve ve an lak hnuin deciding set ah an inhnehtawk zui viau a, dinhmun derthawng zawkah 6th seed Rublev a tang. Rawlthar Rune hian decind set ah hian 5-3 in hma a hruai hman zet a. Hun pawimawh takah a serve a hum zawh loh vangin chak theihna hun tha a hloh. Vanneihthlak taka a him hauh hnuin Rublev hi tie-break ah a che tha zawk a, set pawimawh tak la in a khingpui hi 6-3 3-6 6-3 4-6 7-6 (11-9) a hneh in, quarter-final a lut.
Quarter-final a intum tur Novak Djokovic leh Andrey Rublev te hi vawithum an inhmachhawn tawh a. vawihnih chak tawh Djokovic hi chungnung zawkah a tang a. Serb in Rublev a hnehna pahnih hi Hard Court ah ve ve a ni a. Australian Open hi hard court a khelh a nih vangin chak tura rinkai zawk a ni. Rublev lakah a chak lohna awmchhun hi Clay Court ah a ni ve thung.
Grand Slam ah vawi 21 champion tawh Djokovic hian Australian Open ah hian a vawi 10 nan champion tumin hma lam a pan zel a. Inelna kal mekah hian a champion thei a nih chuan Nadal record a nihrual chiah ang.
Thawhtanni a inkhel dangah Ben Shelton chuan a hnampui JJ Wolf nen set nga an khelh hnuin hnehna a chang hram a. Australian Open a khelh hmasak berah quarter-final a lut nghal. Grand Slam a khelh vawihnihnaah quarter-final lut turin Shelton hian a khingpui JJ Wolf hi 6-7 (5-7) 6-2 6-7 (4-7) 7-6 (7-4) 6-2 in a hneh.
Inkhel dangah Tommy Paul chuan 6-2 4-6 6-2 7-5-a a khingpui Roberto Bautista Agut hnehin quarter-final a lut ve bawk.