Arsenal kutah EPL Trophy

Pathianni zan khan English Premier League 2025-26 khelh chhunzawm a ni a. Champion tura chak zel mamawh Arsenal chuan London Stadium-ah harsa takin hnehna an chang. West Ham United an hneh vangin Arsenal hian champion an hnaih leh zual a, champion turin vawi hnih chak chiah an mamawh tawh. Pathianni zana inkhel dangah Aston Villa an chak zo lo.
Mamawh chhanna Trossard
West Ham United hmachhawn tura London Stadium a lenglut Arsenal hi hlauhna rau mak tak maiin a man a, him tuma tankhawh Hammers lakah hlauthawng takin an inlan. Game dawih tak khel Gunners hian hun tawp dawn tepa Leandro Trossard goal thun hmangin hnehna an chang a. West Ham goal thun hnawl a nih hlauh bawk vangin point thum hlu tak an hmu. Mamawh laia chhanna chu Leandro Trossard a ni.
London stadium a lenglut Arsenal hi champion tur chak mamawh an ni a, mualneitu West Ham hi him beisei zui tura chak mamawh an ni ve thung a, an dinhmun a inang lo hle. Champion tura chak mamawh zawk Gunners in goal thun tumin tan an khawh a, inkhel tir lamah hlauhawm an siam. Leandro Trossard leh defender Riccardo Calafiori ten an hun tha neih an hloh. A tir lamah khel tha lo mah se West Ham an insiamtha a, awmzei nei takin Arsenal an hmachhawn.
Goal thun mamawh tak chunga an thun theih lawk loh vangin Arsenal an hlauthawng a, thlahrang hmu ang maia ngaihnam lovin an inlan. Na taka an khingpuite nawr tura ngaih an nih laiin draw hram an tum emaw tih mai tur a ni hlauh thung a, ball an inpe let nasa hle. An dawih luatah goal an chhuah teuh hle nghe nghe a, si nghak David Raya chetthat zarah si an phur hmasa em lova, vanneihthlak takin an him.
Arsenal manager Mikel Arteta chuan hun tawp dawn hnaih lamah khel tha lo Bukayo Saka leh Eze te lachhuakin Martin Odegaard leh Noni Madueke te a luhtir. Madueke luh hnuin game a nung sauh a, goal thun tumin an khingpuite an nawr nasa leh zual. Hun tawp dawn tep minute 83-naah Odegaard siamsak atangin Leandro Trossard chuan goal pawimawh tak a thun a, Arsenal in hma an hruai ta nge nge.
Him an tumnaa point mamawh West Ham in an si phurh sut ngei tumin tan an khawh a, Arsenal an nawr buai hle. Uiawm taka an hun tha neih an hlah hnuin hun pek belhah corner atangin goal an thun ta nge nge. Corner-ah hian Hammers player te Arsenal si nghak David Raya lakah an foul vangin VAR rawn a ni a, an goal thun hnawl a ni. An goal thun hnawl a nih vangin West Ham hian an si phurh an sut thei ta lova, an mualah uiawm taka tlawmin tlak an hnaih leh zual.
Arsenal kutah trophy
West Ham United lakah harsa taka an chak vangin Arsenal in champion an hnaih leh zual a, an kutah trophy a awm tawh. An kuta trophy awm mek hi an thlauh leh thlauh loh a ni tawh mai.
Gunners hian an hnuai chiaha awm Manchester City aiin vawi khatiin an khel tam a, point 5 in an sang zawk mek. Gunners hian tlahniam chiang tawh Burnley leh Europa Conference League final khel tur Crystal Palace te an hmachhawn leh dawn a. An chak chak ve ve a nih chuan khawih buai phak lohin an champion dawn. An khingpuite tan inkhel awmze awm lo a nih tawh vangin Gunners tan hian chak a har lo tura ngaih a ni. Heti a nih vang hian Arsenal tan chak a harsa lo leh zual tura ngaih a ni a, Arsenal tan champion na kawng a inhawng zau leh zual a ngaih a ni.
Villa an chak zo lo
Palina ni tura chak mamawh Aston Villa an chak zo lova; Burnley nen 2-2 in an inhnehtawk.
Tlahniam tawh Burnley lakah an chak zawh loh vangin Villa tan champions league khel turin tan khawh zui hle a la ngai dawn.
Tlahniam tawh Burnley hian Turf Moor-a an mikhual Aston Villa lakah bul an tan tha a, inkhel tan atanga minute 8-na lekah Jaidon Anthony chuan hmahruaina goal a thun nghal. Hma taka goal an chhuah hi hun rei tak an sut theih loh hnuin Villa tan Ross Barkley chuan minute 42-naah a sut a, 1-1 a inhnehtawk chungin chawlhlawk an hmang.
Chawlhlawk hnu lamah team hnihte an inhnehtawk zui viau a, minute 56-naah Ollie Watkins chuan hma an hruai letna goal a thun. Hma an hruai let vangin phur viau mah se Villa hi an phur rei thei bik lo. Goal an chhuah atanga minute hnih hnu lekah Burnley tan Zian Flemming chuan goal thun ve leh zatin an si phurh a sut. Goal li a luh hnuin goal dang a luh belh thei taw lova, 2-2 in an inhnehtawk zui ta a ni.
Burnley lakah chak se Aston Villa hian palina luah mektu Liverpool lehpelin top 4 huang an luah chiah dawn a. Uiawm taka an chak zawh loh vangin Liverpool point hmuh zat hmu ve bawk mah se panganaah an awm chhunzawm a ngaih phah thung.
Pathianni zana inkhel dangah Crystal Palace leh an mikhual Everton te 2-2 in an inhnehtawk ve bawk. Everton in 2-0 a hma an hruai reng hnuin Palace in harsa takin an sut zo va, Eagles hian Everton in European competition khelh phak an beiseina an tihthlawnsak a ni ber mai.