Arsenal mamawh chhanna tur Gyokeres

Last updated Jul 28, 2025 8 0
Striker mamawh Arsenal chuan an mamawh chhanna ni thei tur striker thar an nei ta a, goal thun thei Viktor Gyokeres chuan an hnen a thleng fel tawh a. Gunners hian vangtlang hriatah Gyokeres an lei fel tih an puan hun chiah nghah a ni tawh.
London club lian Arsenal hian season liam ta khan EPL-ah goal 69 an thun a, hei hi 2023-24 season-a an goal thun aiin goal 22 zetin a tlem zawk. Season liam ta EPL-ah Gunners tana goal thun tam ber chu Kai Havertz a ni a, goal 9 chauh a thun. Striker pangngai Pierre-Emerick Aubameyang-a’n a chhuahsan hnu 2019-20 hnu lamah Arsenal hian season khata goal 20 chuang thun thei an nei ta miah lo. Striker pangngai, tlarhmaa player hriam an nei lo hi an buaina a ni a, EPL-ah season thum chhung ngawt pahnihna an nih zawn nachhan pawh a ni tel bawk. 
Gunners hian season liam ta khan Gabriel Jesus an chhawr tam thei lova, striker pawh ni lem lo Kai Haverz chu tlarhmaah an chhawr nasa a, Havertz hian goal 9 lai a thun ta hial bawk. Havertz a inhliam vangin midfielder Mikel Merino chu tlarhmaah an chhawr zui leh bawk. Striker pangngai an neih loh vangin goal an thun tam thei lova, hun pawimawh takah chak zawh loh khut an hrat hle. Goal thun an harsat miau vangin trophy la lo bawkin season an hmang zo. Arsenal hian season nga chhung zet chu trophy an la thei lo zawn ta hial a ni.
Striker goal thun thei an neih loh vanga an buai fo vangin Arsenal tantuten world class striker la lut turin club thuneitute an nawr na hle. An buaina tireh a, an mamawh chhanna ni turin striker tha lak tur an dap kual nasa hle. Manager Mikel Arteta duh ber chu RB Leipzig lehh Slovenia forward Benjamin Sesko a ni. RB Leipzig in Sesko an chhiar to vangin Sporting CP tana goal thun thei tak Viktor Gyokeres lam an hawi. Gyokeres hian Arsenal zawm duh mah se Arsenal leh Sporting ten man leh mualah inremna an nei fel thei mai lo. Inremna an neih theih lawk loh vangin Gunners hian England forward Ollie Watkins lam an hawi hman hial. Newcastle United tana goal thun thei tak, EPL-a player hriam sa Alexander Isak an hmu tai viau bawk. Striker lak tur an dapkual reng Arsenal tantuten an awh em em Gyores an dawr nawn leh a, an la lut thei ta nge nge a ni.
Arsenal tlarhma luah lum tur Viktor Gyokeres hian season liam ta khan Primeira Liga-ah goal 39 zet a thun a, top-scorer ni tura a elpui zingah goal 20 thun tling an awm lo va, Golden Ball a dawng chiang hle. Season liam ta khan Europe a league lian zual 10 zingah goal thun hnem ber a ni nge nghe a. League lian zual palite te aia Primeira Liga-a goal in point a hmuh tlem zawk vangin European Golden Shoe a dawng phak lo tlat thung. 
Gyokeres hian goal a thun theih em vangin club hrang hrangin lak luh an duh a. Manchester United ngei pawhin lak tumin an dawr. United manager Reuben Amorim hi Gyokeres hrechiang leh duhsak em emtu a ni naa Swedish striker hian Arsenal zawm a duh zawk tlat thung. Arsenal a zawm theih nan a tih theih zawng zawng a ti a ni ber mai. Gunners a zawm chak vang hian pre-season training a zawm duh lova, agent hnenah agent fee tihniam turin a ti a, amah dawrtu club dang zawng zawng a hnar bawk. Arsenal zawm a chak em vanga nuar a ni a, a zawm chak em em Arsenal chu a zawm thei ta nge nge. Bench a thu turin Emirates Stadium a pan lova, player pawimawh; goal thun khawl ni tura pan a ni. Sporting tan vawi 102 khel a, goal 97 zet thun thei a ni bawk a, EPL-ah a goal thun kan hmuh fo a rinawm.
Sweden tan vawi 26 khel a, goal 15 lai thun tawhtu Gyokeres hi English football-ah a mikhual hran lem lova, Brighton leh Coventry tan a lo khel zauh tawh. Khawvela tualchhung league lian, ropui leh harsa ber English Premier League-ah a inlan dawn ta a, fiahna hautak zawk a hmachhawn a ngai dawn. 2020 hnu lama champion na la nei leh ta lo Arsenal hi trophy lakpui ngei a tum hle ngei ang. 
Teuh deuha a tawp thleng zo lo thin Arsenal hian champion tumin tan an khawh nasa hle. Nipui bazar inhawng mekah £210m zet an seng tawh a, Gyokeres an lak luh hma hian  midfielders Martin Zubimendi leh Christian Norgaard, goalkeeper Kepa Arrizabalaga, winger Noni Madueke leh centre-back Cristhian Mosquera te an la lut fel tawh. Gyokers an lak luh tawh bakah Crystal Palace atangin Eze lak tumin hma an la leh mek bawk. Mikel Arteta hnuaiah nipui bazara sum an sen tam ber tum Gunners hian an tawng chho mek a ni.