Taylor Swift chu Billboard Artist 100 chart-ah a No.1 a, he chart-a a No.1 tawh zawng zawng belhkhawm chu kar 66 a tling ta chiah a, he chart-a No.1 ni ngun ber a nihna a sawhnghet leh ta sauh e. Hetihrual hian Jonas Brothers, Daft Punk leh Bailey Zimmerman te pawh top 10-ah an lang.
Billboard Artist 100 chart hi kar khat chhunga US-a zaithiamte lardan tehna niin, chart ranking siam nan hian an album leh hla hralh tam dan te, radio airplay leh streaming te chu tehna pawimawh a ni.
Taylor Swift hian a album hrang hrang hralh that zar a zo a, a album pakua chu Billboard 200 (albums) chart top 40-ah langin, chung zingah chuan ‘Midnights’ chu No.2 niin, a album dang Lover pawh No.10 a ni a, Folklore (14), 1989 (19), Red (Taylor’s Version) (22), Reputation (23), Speak Now (27), Evermore (28) leh Fearless (Taylor’s Version) (32) te top 40-ah an lang bawk. Hetianga chart top 40 china album pakua chin tum hnih nei thei hmasa ber a ni.
Taylor Swift hian album bakah a hla pawh a hralh tha viau a, a hla ‘Anti-Hero’ chu Billboard Hot 100 (singles) chart-ah No.10 a la ni a, a radio single thar ‘Karma’ chu No.32 a ni bawk a, hengte avang hian Billboard Artist 100 chart-ah No.2 atangin No.1 a kai thar leh ta a ni.
Taylor Swift hi tun kum 9 chhungin Artist 100 chart-ah hian vawi 66 a No.1 tling tawh a, he chart-a No.1 ni ngun ber niin, Drake (37), The Weeknd (28), BTS (21) leh Adele (20) ten an dawt.
Jonas Brothers pawhin an album thar ‘The Album’ hralh that zar an zo a, an album thar hi Billboard 200-ah No.3-ah a debut a, an hla Hot 100-a lang thei an nei bawk a, hei hian Artist 100 chart-ah a vawrh sang ta a ni.
Daft Punk pawh a vawi khat nan he chart top 10-ah hian langin, No.7 an ni a, anni pawhin an album hit zet mai ‘Random Access Memory’ 10th anniversary deluxe reissue an tihchhuah an hralh that zar an zo a, he No.1 album hlui hi tunah No.7 a rawn kai thar leh ta a ni.
Bailey Zimmerman pawh No.20 atangin No.10-ah a invawrh a, ani pawhin a album thar ‘Religiously: The Album’ hralh that zar a zo a, he album hi Billboard 200 No.7-ah debut a, hei hian Artist 100 chart-ah a vawrh sang ta a ni.
Artist 100 Top 10:
1 Taylor Swift
2 Morgan Wallen
3 Ed Sheeran
4 Luke Combs
5 Jonas Brothers
6 SZA
7 Daft Punk
8 The Weeknd
9 Drake
10 Bailey Zimmerman
Artist 100-ah Taylor Swift-i’n a record a sawhnghet
Get real time updates directly on you device, subscribe now.