ASF hrilenna finfiah belh

African Swine Fever (ASF) hrilenna finfiah belh a ni a, kuminah district pathumah he hri hi finfiah a ni ta.
Kuminah Mamit district leh Lawngtlai district-ah ASF hi finfiah a ni phawt a, Siaha district-ah finfiah thar a ni. Vawk thi zat pawh a pung chak hle.
April ni 4-a AH&Vety department report-ah Siaha district hi a lang thar a, hemi ni hian vawk 26 a thi. AH&Vety department hotute chuan March thla tawp lam atangin Siaha-ah hian vawk a thi tawh a, ASF a leng tih finfiah a nih takah chuan a hmaa mite pawh ASF vanga thi-ah ziah luh a ni tih an sawi.
AH&Vety department chhinchhiahnaa a lan danin, March ni 21-ah ASF vanga vawk thi a awm tan a, hemi ni hian vawk 222 a thi tih a ni. March ni23-ah vawk thi a awm lo a, chumi tih loh ni dangah chuan March ni 21 hnuah vawk thi a la awm ziah.
Vawk thi zat hi a pung chak a, April ni 4 thlenga kumina ASF vanga vawk thi zat chu 1043 a tling tawh. Vawk 307 suat/tihhlum a ni tawh bawk. ASF hi natna tihdam theih loh a nih avangin a darh zel loh nan a vei chu tihhlum thin a ni.
ASF hian kum hmasa lamah Mizoram a lo tibuai tawh a, thlasik laia hun engemaw chen a reh hnuah thla hmasa tawp lam atang khan a rawn lang leh a ni. AH&Vety department lam chuan tunlaia he hri a rawn lang leh thil mak a nih loh thu leh, leng leh tura ngaih a nih thu an sawi a, he hri hian Mizoram a chen chilh tawh avangin rawn lang leh thin tura ngaih a nih thu an sawi bawk.