Press Information Bureau leh Ministry of information & Broadcasting hnuaia Central Bureau of Communication buatsaihin Thawhtanni khan Aizawlah media mite pualin workshop neih a ni a. India-in kum 9 kalta chhunga kawng hrang hranga hmasawnna a hmuh leh scheme pawimawhte photo exhibition leh paper presentation hmanga pho chhuaha sawi ho a ni.
He hun hmanpuitu MLA Dr ZR Thiamsanga chuan Prime minister Narendra Modi kaihhruai sawrkarin kum 9 chhung lekin khawvela ram economy lian 5-naa India a kaipui pha chu lawmawm a tih thu sawiin, India hmarchhak pawhin hmasawnna tam tak a hmu tih a sawi a. Mizoramah damdawi in tha tak Zoram Medical College an din bakah Asia rama tha ber ni turin Cancer Speciality Hospital, cheng nuai 7000 chuanga sak tumin engkim peihfel a ni tawh tih a sawi bawk.
Tunhnaiah Mizoramin tehna hrang hrang hmangin India ramah pakhatna hauhna a ngah tih sawiin, sawrkar department tam zawk hnathawh pho chhuah ni lo mah se, an hnathawh rah chhuah mekte hmuh theihin a awm tih Dr ZR Thiamsanga hian a sawi a ni.
He hun hmanpuitu dang I&PR joint director PB Lianthangpuii chuan, social media-ah chanchinthar tam tak hmu thin mah ila, chanchin dik leh rintlak thehdarh chu journalist-te chungah a innghat tih a sawi a. India sawrkar scheme tha tak tak phochhuah a ni chu lawmawm a tih thu sawiin, scheme thenkhat chu central media units lamin an thehdarh thin avangin state I&PR pawhin a hriat loh a awm nuk a, hemi kawngah hian PIB nen inpawhna tha tak an neih theih avangin lawmawm a tih thu a sawi a ni.
Workshop-ah hian India-in kum 9 kalta chhunga Seva, Sushasan leh Garib Kalyan-a kawng hrang hranga hmasawnna a hmuh leh scheme pawimawh te pho chhuah a ni a. LESDE, ICT, Agriculture leh Social Welfare & Tribal Affairs department atangin resource person-ten an hnuaia heng hmalakna awmte an sawi a ni.
Sawrkar hmalakna inhrilhfiah
Get real time updates directly on you device, subscribe now.
Prev Post