ASF nasa telh telhah ngai lo

Mizoram tibuai mektu African Swine Fever (ASF) vangin vawk thi a la awm reng a, mahse he hrileng hi a nasa telh telh tia sawi tur chu a ni lovah ngaih a ni.
AH&Vety department hotute chuan vawk thi la awm reng mah se a nasa telh telhah an ngai lo tih an sawi a, a tlahniam tia sawi tur pawh a ni chuang lo an ti.
He hri hi a len hmasakte nena khaikhinin, a darhzau rih lo zawk tih an sawi a, ASF hmuh lohna district a la awm thu te, ASF awmna district-ah pawh hmun hrang hrangah zau takin a darh rih lo tih te an sawi.
June ni 4 thleng khan Champhai, Aizawl, Lunglei, Saitual, Khawzawl, Serchhip leh Kolasib district-ahte ASF hi hmuh a ni tawh. Aizawl district-ah pawh Aizawl khawpuiah a darhzau a, district dangah hi chuan hmun hrang hranga darh a ni rih lo. Champhai district-ah khaw pahnihah ASF hi hmuh a ni tawh a, Lunglei district-ah khaw pahnihah, Saitual district-ah khaw pathumah, Khawzawl district-ah khaw panga-ah, Serchhip district-ah khaw pahnihah, Kolasib district-ah khaw pathumah hmuh a ni tawh. June ni 5-ah Mamit district a lang thar a, Ailawngah hmuh niin, vawk thi erawh a awm lo.
AH&Vety department hotute chuan tum dangah pawh June leh July vel hi a darh hun a nih thin thu an sawi a, chuvang chuan kuminah pawh fimkhur zel a ngai tih an sawi.
ASF hi 2021-ah Mizoramah hmuh a ni a, AH&Vety department chuan 2021 kum tir lam atanga 2022 February thlenga hrileng kha a thawh khatna tiin an chhinchhiah. 2022-ah hian a thawh hnihna a leng leh a, a thawh hnihna hi 2022 February thla chawhnu lamah a intan a, December ni 22-ah a tawp. 2023-ah a thawh thumna a leng leh a, 2023-a an finfiah hmasak ber chu May ni 6-a mi niin, chu chu tawp lovin a la leng ta zel a ni.
2023 May thla atangin a thawh thumna a leng a, kumin April vel atangin a zual tih chu AH&Vety department hotute sawi dan a ni. Mahse tun hnaiah he hrileng hi a nasa telh telh rih lo an ti.