Asia chhim lam football awpbettu India

Asia chhim lam football awpbettu India
Penalty peta Kuwait hnehin a vawikuana atan India kutah SAFF Championship title a lut a; champion lai Blue Tigers tan hian hun pangngaiah Lunglei tlangval Lallianzuala Chhangte chuan mualneitu team siphurh sutna goal a thun nghe nghe.
Bengaluru khaw Thawhlehni zan final-ah hian Shabaib Al Khaldi chuan minute 14-na lekah Arab team hmahruaina goal tilutin, chawlhlawk hma minute 39-ah Lianzuala’n India siphurh a sut a; extra time zawh thlenga 1-1 a nih avangin shootout hmanga chinfel an ngai a, tah pawh chuan vawinga ve ve petah 4-4 a la ni leh cheu a, sudden death rule hmanga pawhthen ngai dinhmuna an din hnuah goalkeeper Gurpreet Singh Sandhu chuan danglamna a thlen ta a ni.
Sandhu hian Kuwait captain Khaled Hajiah pet a dan hmangin home fans a sapataltir a, 5-4-in India an chak.
Team pahnih hi an group match hnuhnungberah khan sikhat ve ve thunin an lo inhnehtawk tawh a, final-ah pawh chungnung zawk an la awm hlei thei ta chuang lo a, penalty shootout-a India vanneihna a kaltluang hle a ni.
July ni 1 khan semi-final match-ah India hian penalty shootout-ah bawk 4-2-in Lebanon an lo hneh tawh a, tah pawh khan India damkhawchhuahna kawngah goal-veng Sandhu bawkin a lo thawhhlawk tawh.
Final shootout-ah hian captain Sunil Chhetri, Sandesh Jhingan, Lallianzuala Chhangte, Subasish Bose leh Mahesh-te’n thunin, Udanta Singh chuan a thelh thung.
First half leh penalty peta Kuwait goalkeeper Abdul Rahman-a dan zawh loh goal khungtu Mizo tlangval Zuala kha Thawhlehni khan AIFF Men’s Player of the Year atan puan a ni a, season liamtaa India player tha ber nih a phuzia lan-tirna’n SAFF Championship-ah India a champion-pui zui leh ta ngat a ni.
SAFF Championship 2023 khelh zawh taka goal nga khung tling awmchhun Sunil Chhetri chu top scorer a nih bakah most valuable player atan thlan a ni a; best goalkeeper award chu Bangladesh goal-veng Anisur Rahman Zico kuta hlan niin, Nepal-in fair play award an dawng ve bawk.
SAFF Championship-ah hian South Asia pawn lam team sawm thin niin, kumin hian world number 102 Lebanon leh world number 141 Kuwait an tel a, Arab team ve ve hi paltlangin world number 100 India chuan an title kawl lai an humhim thei.