Tlawm pumpelh hram Rybakina

Tlawm pumpelh hram Rybakina
Defending Wimbledon champion Elena Rybakina chuan hlauthawng taka bul a tan hnuah set hmasaber hloh zet chungin first-round-a tlak a pumpelh hram a, American Shelby Rogers lakah 4-6 6-1 6-2 hnehna a chang.
Kazakh nula hian a title kawl lai humhim tura a chetchhuah hmasakberah double fault-in bul a tan phawt a, Royal Box-a mipa singles title pariat la tling chunga chawl ta Roger Federer thut ve vang nge ni dawn a tir lamah a ‘nervous’ tih a hmuh theih a, mahse, set hnihna atangin champion lai nge nge chu a hriat chho a, set hnuhnung pahnihah harsatna lian tham a tawk zui lo.
Bul tan fuh lo Rybakina a chak leh tak avang hian kum 1994 hnu lama he stage-a women’s defending champion tlawm hmasaber nihna a pumpelh a; kum 29 liamta khan champion lai Steffi Graf chu American Lori McNeil lakah a mualpho a, khami hnu khan first round-a hmeichhe champion lai tla hi an awm leh ta lo a, Rybakina hi German hranghlui hnungzui thei mai dawnin first set-ah a inlan hman a, kawng dik a zawh zui leh ta thuai a ni.
Moscow khawpuia piang, Kazakhstan khua leh tui ni zui ta Rybakina inkhel hi tennis a chawlhsan hnua Wimbledon-a a kirleh vawikhatnaa chawimawina dawng Federer leh Princess of Wales chuan Centre Court Royal Box atangin an thlir a; hnehna a chan hnua news conference a hmachhawnah Rybakina chuan tan phata a ‘nervous’ chhanah Federer lo thu ve kur kha a mawhpuh deuh a, a naupan zual laiin Swiss superstar inkhel chu a thlir fo thin tih a tarlang tel.
Kum 24 mi Kazakh hian nikum khan court 11-ah Wimbledon campaign a tan a, kuminah erawh champion lai ni chunga inlan a ni bawk a, world number 49 Rogers a hmachhawnna khelmual kha a Grand Slam title hmasaber sual-chhuahna Centre Court ngat a ni ta a, a boruak a lian ve bawk a, a tir lama han chi-ai deuh pawh kha a mawh lo e!
Rybakina hian kum 2016 champion Serena Williams hnu lama London tournament liana women’s singles title hum leh thei hmasaber nih a tumna kal zel second round-ah France player Alize Cornet leh Japanese Nao Hibino inkhela chak zawk zawk a tum leh ang.
Nikum final-a chak zo ta lo Tunisia chhuanvawr Ons Jabeur erawh chuan harsatna lian tham tawk loin first round a paltlang a, a Grand Slam title hma-saber tur a beisei lehna kawngah world number six hian 6-3 6-3-in Pole Magdalena Frech a hneh.
Nikum runner-up Ons Jabeur hi kuminah sixth seed ni chungin All England Club-ah a inlan a, ruahsurin an inkhel a tihbuai avangin Court One chungkhuh hnuaiah 70th-ranked Frech a hnawtchhuak.
Hnehna a chan hnuah Arab leh African tennis player zinga thleng sang ber Jabeur hian fiamthu thawh zauhin, court chhunga a chet dan chu khelmuala Cristiano Ronaldo khawsak dan nen a hmehbel vel!
“Kan seilen chhoh lai khan phaitual hnim chungah tennis ni loin football ka khel nasa a, football hi ngainat pawh ka ngaina reng a, chuvangin he hmuna ka han inkhel hi Ronaldo inkhel angah ka inchan thin,” a ti!
A chawrchhuahna Belarus-in Ukraine do kawnga Russia a thawhpui avangin nikum Wimbledon-ah Belarus leh Russia ram player-te chhuah ve phalsak an ni lo a, kuminah erawh an ram hming chhawm tel loa tel phalsak niin, Bela-rusian second seed Aryna Sabalenka pawhih a bultanna inkhelah straight-set hnehna a chang ve nghal.
Sabalenka hian Centre Court-ah ngei a hlap natzia pholang lehin, Hungarian world number 82 Panna Udvardy lakah 6-3 6-1 hnehna awlsam a sualchhuak.
World number two Sabalenka hian danbeh a nih hnua grass-court grand slam a ngaihzia sawichhuakin, a first round match-a a chetthat chhan pawh khati taka London tournament a ngaih
vang kha nia a hriat leh nikum champion-ship a khel thei lo na a tih thu a sawi.
Australian Open champion chuan, “Wimbledon hi ka hmangaih takzet a, kum hnih kaltaa semi-final ka lo khelh ve tawh kha hriatrengna ropui niin, nikum zet erawh kha chu ka tan a harsa ngawih ngawih a, kumina he hmun ka luah leh thei hi ka hlim em em a ni,” a ti.