Aspirational Block tih hmasawn beihpui zo

Lunglei district Lungsen Aspirational Block-a hmasawnna tehfung (indicator) hrang hrang hlen chhuah a nih theihnan NITI Aayog hnuaia January 28 – April 14 chhunga beihpui thlak, Sampoornata Abhiyan 2.0 kharna leh Lunglei district bawrhsap bultuma mipuiin an kawtkaiah an mamawhna zawna sawrkar an dawr theihna, “I Kawtkaiah Sawrkar” (Prashasan Gaon Ki Ore) hun chu Lungsen BDO Complex-ah Ningani khan neih a ni.
Lungsen block development officer Lalhruailiana Zote chuan Sampoornata Abhiyan 2.0 hi India ram puma Aspirational District 112 leh Aspirational Block 513-ah kalpui a ni a; chu’ng zingah chuan Lungsen Aspirational Block pawh a tel tih a sawi. He campaign hi thla hnih leh a chanve chhung, January 28 atanga April 14, 2026 kalpui a nih chhungin Lungsen Block chuan kawng tam takah hmasawnna leh hlawhtlinna a hmuh phah thu a sawi.
Sampoornata Abhiyan 2.0 hnuaiah hian Lungsen Aspirational Block chhungah hriselna leh chaw tha, zirna leh kuthnathawh kaihhnawih tehfung paruk – ICDS hnuaia naupangte chaw tha pek, Anganwadi Centre-a naupang rih zawng leh san zawng dik (measurement efficiency), Anganwadi-a inthiarna leh tui thianghlim hnianghnar neih, sikula hmeichhe inthiarna tha tawk siam leh bawng vulhte hri danna pek that kawngah hma lak niin, hmasawnna chhinchhiah tlak tak hmuh a ni tih sawi a ni.
Lungsena Sampoornata Abhiyan 2.0 khar ruala “I Kawtkaiah Sawrkar” hun buatsaihah hian department hrang hrang — DC office, BDO office, Health, AH & Vety, Horticulture, P&E, PHE, ICDS, FCS&CA leh Mizoram Rural Bank ten stall hawngin, awlsam zawka mipui dawr theihin an inpho chhuak. Lehkha pawimawh – Aadhaar, ST/ Residential/ Income certificate, job card, voter ID, ration card adt. siam thar/siam that, bank account hawn thar leh service hrang hrang, mihring leh ran inentir leh hri danna pek, sawrkar ruahmanna chungchang inzirtir leh inziahluh a ni. Heng service hrang hrang chhawp chhuah hi mi 500 chuangin an chhawr tangkai a ni.