SASCI sum lapse-in a nghawng ho tlawh

MNF Publicity Board chuan Ningani khan ZPM sawrkarin SASCI sum hmanga hna a ruahman, cheng nuai 323 lapse-na Bethlehem Vengthlang Hall sakna tur leh, nuai 144 tih lapse-na Ramthar Veng Multipurpose Community Centre sakna tur hmun chu MNF Block leh Unit hotute nen an tlawh.
MNF Publicity Board secretary VL Krosshnehzova chuan, cheng nuai 32800 hmanga hnathawh tur kal mekah nuai 11152 chu hman tur awm loin a lapse niin a sawi a. Heti zat ram rohlu siamna turin mual a liam mai chu pawi a tih thu a sawi. “Hmun hrang hranga hmasawnna thlentu turin a nih tur ang a thleng pha dawn ta lo hi a uiawmin, ZPM sawrkar sum enkawl thiam loh leh inthlahdah rah kan tel a. Hmasawnna thlenna hmun veng mipui beisei ang thleng pha lo tur hi a pawiin, a ngaihna hre lo sawrkar hi MNF chuan kan dem a ni,” a ti.
Heng sum mualliam avanga hnathawh kal lai khaihlak tur leh ruahman sa anga thleng pha lo tur chu a pawi tih sawiin, central atanga sum sawichhuah liantham hriat tur awm loh lai a, SASCI hmanga hmuhte a riral mai chu thil lungchhiatthlak tak a ni tih a sawi.
A thawktu tur hriat sa, restricted tender hmanga hnathawh SASCI 2025- 2026 Part I hnuaiah hian hna 41 thawh tura ruahman niin, hlawm lianthama duhsak zawngte blanket approval hmanga hna pek a ni tih VL Krosshnehzova hian a sawi a. Sum ruahman atanga 34% chu second installment-a lokal tur a ni a, mual a liam ta tih a sawi a ni.
“Heng zinga hna 15 hi Aizawl Municipal area ami an ni a, heng hna 15 atang hian sum nuai 1990 a tham ral dawn ta a, Aizawl mipui tana channa nasa tak a ni. Sum enkawl kawnga ZPM sawrkar kal dan hi sawrkar tura an insawi dan nen inpersan tak a ni,” a ti.
First Installment 66% hmanna utilisation Certificate pek mumal loh avanga heng sum hi bothlau a ni tih a sawi a. Tih tur tih mumal loh avang chuan hetiang hi thleng nawn tawh lo se an duh tih sawiin, “An sawrkar hmaa hre ber anga sawrkar hmasa thiltih an sawi zar zar laiin, a tak taka hnathawh kawnga a thlangtu mipui beisei an phak loh zia a lo lang ta a. Kan thlan lal fuh lohten an duh duha an chinleh tur AMC-a ZPM candidate-te hi mifel tak tak ni mah se, thlanchhuah chi an nih loh zia a chiang telh telh a ni,” MNF hruaitu hian a ti.