Ni 70 chuang him hnuah Covid vei mi pathum

Hun engemaw chen Covid-19 hri vei hriatchhuah an awm loh hnuah tun hnaiah hriatchhuah thar pathum an awm leh a, vanneihthlak takin ngaihtuahawm an awm lo.
Thuneitu lam pawhin thil ‘serious’ takah an ngai lem lo a, hri a darh leh tihnaah an ngai lem lo tih thu dawn a ni.
February ni 28-ah khan hriatchhuah thar pakhat a awm a, hei hi nikum December ni 12 hnua hriatchhuah leh hmasak ber a ni. March ni 2-ah hriatchhuah thar pahnih an awm leh.
Thu dawn danin, February ni 28-a hriatchhuah tia puan hi February ni 24-a mi a ni a, a hriatchhuahna damdawi in lamin an report har deuh avangin ni 28-ah puanzar a ni. Mipa a ni a, symptom nei lo, damdawi ina thil danga inentira a kal, fimkhur thua lo en a ni.
Kumina hriatchhuah pathumte hi symptom nei lo vek an ni a, fimkhur thua endik an ni vek.
“Symptom nei lo vek an ni a, symptom nei lo, inringhlel pawh ni lote hriatchhuah an ni tihna a ni a, kan fimkhur hle tihnaah kan ngai. An kalna damdawi in lamin fimkhur taka an lo en hi thil chhinchhiah tlak a ni,” Covid-19 chungchanga sorkar thupuangtu Dr Pachuau Lalmalsawma chuan a ti.
“A darh leh tihnaah kan ngai lo a, hripui leng ngang a ni a, hriatchhuah leh a awm thei tihna a ni ber mai ang. He hri hi a la bo lo,” a ti bawk.
Zirtawpni zing dar 7 thlenga Mizorama hri vei hriatchhuah tawh zat chu 2,38,967 a ni a, mi 726-in an thihpui tawh.