Assam lam ramri ah ruihhlo do beihpui kan thlak tel ang – Home minister

Myanmar nena inrina chauh niloin, Assam state nena inrina lamah pawh ruihhlo do beihpui thlak tel a ni dawn tih Home minister K Sapdanga chuan a sawi.
Inrinni zinga YMA Silchar Branch hruaitute nen an inkawmnaah Home minister chuan, Mizoram sawrkarin ruihhlo do beihpui a thlak mek a, Mizoram leh Myanmar inrina khaw 22-ah YMA Branch an ngen a, an ni nena thawkhoin heng khuaah hian police an dah vek a, tunah chuan Aizawlah pawh ruihhlo a to sawt hlein an hria a, Assam nena inrinaah pawh hma lak tum a ni tih a sawi.
Silchar YMA hruaitute hian, ramri hnaiha awm an nih avangin ramri buaia tlanchhiatna tur leh mipui humhimna tur hall an mamawh tih an thlen a. Mizoram sawrkara ministry dangah pawh an thlen changin hma lak an lo tiam tawh thin a, a hmunhma pawh an enhopui thin a, a hlawhtlinna hmel an la hmu lo tih an sawi a ni. An thu thlen hi a tul anga bawhzui a nih tur thu K Sapdanga hian a hrilh. YMA Silchar Branch hruaitute hian member 400 vel an awm tih an sawi a ni.
Silchar Mizoram House-a thawktute pawhin minister hnenah hian an mamawh an lo thlenin a. House-a Mizoram Police awmten silai an kawl ngai lo a, hei hian police hmalakna kawngah a tithuanawp thin tih an sawi. Mizoram Police hian office leh quarters an neih loh avanga an buaina thlen a ni bawk.
Home minister hian Silchar Mizoram House-ah SASCI sum atangin in sak belh a ni dawn a, police duty-te mamawh pawh a tel theih ngei a beisei tih a sawi. Silchar-a Transport department hmun, MST Bus Station hlui chu ramri hung that a, hman tlaka lei chhun khah tha a tih thu a sawi a, House hmar lama ram awl chu tangkai zawka hman a nih theihna turin Silchar Mizoram House DRC chu a tul ang lo bawhzui a, proposal siam turin a ti a ni.
Home minister hi YMA nen an inkawmnaah hian minister Lalnghinglova Hmar leh Silchar Mizoram House DRC Lalhmingliana ten an tawiawm a ni.