Lo sawi lo sawi lo turin mi dang chah

On Oct 6, 2025 6 0

Mizoram chief minister Lalduhoma’n rorelna thil “lo sawi lo sawi lo” turin mi dang a duh a, he thu hian tun hnaiah chai zui a hlawh, social media lamah pawh titi a tling.
September ni 22-a ZPM office-a thu a sawiin chief minister hian ram rorelnaa mi dang inrawlh ve a tul a tih loh thu a sawi a, ZPM MLA 27-te’n tha an tih angin ro an rel dawn tih sawiin, mi dang tan “lo sawi lo sawi tur a awm lo” tiin a sawi.
“Kum nga chhung Mizoram rorel turin Pathian leh mipuite’n min dah a ni. Rorel hi chu kan hna a ni, tha kan tih angin ro kan rel ve ang, relpui vak kan ngai lo. Party dang rorelah te, NGO rorelah te kan inrawlh ve ngai reng reng lo keini pawh. Anmahni hmakhua a ni a, anmahni purview a ni a, kan va inrawlh lo,” tiin hemi tum hian a sawi.
“Chuvang chuan mipuiin rorel turin min thlang tling a, rorel lai MLA 27-te’n mipui ai kan awh a. Chu mite’n tha kan tih chu kan ti dawn a ni mai a ni. Lo sawi lo sawi tur a awm lo helaiah hian,” tiin a chhunzawm a ni.
Hemi tuma a thusawi hian khel zui a hlawh a, vai hnawhchhuah a tum thu a sawi te, India mitmei ven a tul thua a chhunzawm chungchang te, state dangin Mizorama vai luh phal lohna dan hnawk an ti ang tia a sawi te’n sawi zui a hlawh. Sorkar rorelnaah mi dang tan lo sawi lo sawi tur a awm lo tia a sawiin sawi zui a hlawh hle bawk.
Hemi tum hian FCAA 2023 chungchang a sawi a, FCAA 2023 hi duh lo an awm bakah duh lova pungkhawmte pawh an awm. FCAA 2023 chungchang hi sawiin, tha an tih thu a sawi a, a thu khar nan mi dang tan “lo sawi lo sawi tur a awm lo” tiin a sawi a ni.
Rorelna thila mi dang inrawlh a duh loh thu hi a hma pawhin chief minister hian a lo sawi tawh thin a, kumin February ni 7-ah pawh khan Central YMA hruaitute leh MHIP hruaitute a lo hrilh tawh.
February ni 7-ah hian Lengpui Airport, Indian Air Force hnena hlan chungchangah, hlan an duh loh thu sawiin NGO Coordination Committee te’n chief minister hi an hmu a, pawl pangate zinga YMA leh MHIP hming lam riin, YMA leh MHIP te chu hetiang thila inrawlh lo turin a ti a ni.
Thu dawn danin, hemi tum hian chief minister hian tlang takin a sawi a, YMA hruaitute leh MHIP hruaitute chu rorelnaa inrawlh lo tura tiin, hemi tuma an thu ken pawh mi tlemte ngaihdan mai a ni tiin a sawi. A tawpah Central YMA lam hian mi tlemte ngaihdan a nih loh thu an sawi a, CCC leh CEC-ahte an lo rel tawh a, Indian Air Force kuta Lengpui Airport hlan hi YMA duh loh a nih thu an sawi ve thung.
April ni 22-a MHIP general assembly a hmanpui tumin chief minister hian MHIP leh tlawmngai pawl dangte chu an hmalakna awm hria a, engkimah inrawlh tum lo turin a lo ti tawh bawk. “Kan hmalakna tur awm tak hi a awm a, mi dangte hmalakna tur awm tak pawh hi a awm mai. Engkimah inrawlh tum lo ang u,” tiin hemi tum hian a sawi a ni.