Ek Bharat Shreshta Bharat hmalakna hnuaiah larsap Dr Hari Babu Kambhampati chuan Zirtawpni khan Durbar Hall Raj Bhavan-ah Nagaland State Day leh Assam Day (Asom Day) lawmna a buatsaih.
Assam hi 1950 January 26 khan India sawrkar hnuaia state a ni tawh a. Kum 1996 atang khan kumtin December 2 hi Assam-ah chuan ‘Sukaphaa Divas’ tiin emaw Axom Divas (Assam Day) tia hman ziah a ni. Hei hi Patkai tlang kalpela Ahom lal hmasa berin Assam luhna ni hriatrengna atan hman a ni. Hetihlai hian Nagaland hi 1963 December 1 khan state-a puan a ni a, Indian Union state 16-na a ni.
Larsap chuan state pahnih mipui a lawmpui tih a sawi a. Assam leh Nagaland te state anga a lo pian theihna tura hruaitu hmasa leh theihtawp chhuahtute zahna chibai a buk tih a sawi a ni.
“State dangte din cham inlawmpuina hian state danga chengte nena inpawhna tha zawk leh India ram anga inpumkhatna a siam a. Hnamdangte nen inthiantha tur chuan an culture leh an nunphung kan hriat a, kan zahsak a pawimawh a ni,” a ti.
Assam state leh Nagaland state chungchang video clip enho a ni a. State pahnihte aiawhin zirlai hruaitu pahnih – Mizoram University Naga Students Union president Nganloi Phom leh Mizoram University Assam Association president Biki Hazarika ten thu an sawi a. MZU vice chancellor Prof. Dibakar Chandra, leh MZU research associate Dr Aosenen Ozukum (Nagaland) te pawhin an state leh culture chungchang an sawi bawk. Cultural item, zai leh lamte entir a ni.
Assam leh Nagaland Ni hmang
Get real time updates directly on you device, subscribe now.
Prev Post
Next Post