Assam Rifles-in minister leh zuitute tibuai Check an tum loh thu sawi siin tikhawtlai

Lengteng bialtu MLA, minister F Rodingliana chu a biala a zin chhung leh Aizawl pana a hawnaah Assam Rifles-in an tibuai a, ama lirthei emaw amah zuitute emaw check an tum loh thu sawi siin, an din tir lawi si a, rei tak an tikhawtlai tih sawi a ni. The Aizawl Post thudawn danin, Lengteng bialtu MLA hian tunkar chho khan a bial fan pahin Champhaiah official function-ah a tel a. A bial a fan lai, October 12 (Inrinni) thimhlim khan Kawlbem khua an lut tur chu Assam Rifles-in tempopary check post an siamah lo tidingin, duty (sepoy) pakhat chuan Vai tawngin tunge a hming tih a zawt a, F Rodingliana hian minister a nih thu leh a designation plate leh India flag tar en turin a hrilh a; he duty hian minister hi tum hnih a hming a zawt nawn leh a, a hming bakah a signature a ngaih thu leh a convoy-ah lirthei engzatnge awm a report a ngaih thu a sawi a. Hetah hian minister zuitute nen an inhnial buai ta deuh a ni.
Minister chungah hian ngaihdam dil turin an phut a, an phut ang hian Kawlbema an luh tawh hnu hian duty pa leh an commander chuan ngaihdam an rawn dil tih thudawnna chuan a sawi.
He thu kal zel hi ni ta nge tih hriat lohin, October 14-a Ngopa an lut tur chu Assam Rifles bawk hian tih din tumin an lo phar a, ding loin minister leh amah zuitute hi an tlan tlang a ni.
October 17 khan Aizawl lam an rawn pannaah Assam Rifles hian Selingah tihdin an lo tum leh tih chu Mizoram Police lam atangin minister hian a hre lawk a, AR ho dinnaah hian Mizoram Police lam pawh an lo indah ve nual nia sawi a ni. Hetah pawh hian tlan tlang lehin, Tuirial chhak Berawtlang hnuai velah kawngah barrel hung tlarin lirthei ke tithep thei tur thir hling (tyre spike) dahin, silai nen an lo thawkchhuak leh tih sawi a ni a. Helai hmun an thlen hi chawhnu dar 1.30 vel nia sawi a ni.
Hetah hian an inhnial buai ta a, video coverage uluk taka tiin, Assam Rifles lama an hotu (captain?) hian a uniform-a a hming inziak pawh a la thla a, minister leh a team-te tih din an tum loh thu a sawi a, Manipur atanga rawn kal lirthei chu an tihdun tum ber zawk niin a insawithiam leh si tih an sawi a ni.
Social media lama minister lirthei check ngai, tih leh, check tir ve mai awm, tih vel darh chungchangah, lirthei hi endik an tum lo hrim hrim a, Kawlbem-a thil thleng kal zel hi ni bera an ngaih thu thudawnna hian a sawi a ni.
He thil thleng chungchangah hian Mizo Zirlai Pawl chuan Assam Rifles an demna thu an chhuah a. An thurel hrang hrang hi Zirtawpni khan chief minister hnenah a bawhzui turin an thlen nghal.
MNF Legislature Party chuan thuchhuah siamin, October 17 tlaia Aizawl daia minister Pu F Rodingliana, 2 Assam Rifles-in zah lo tak leh a programme tibuaia kan ram chhung ngeia rei tak ralthuam nena rikrapa an dang khawtlai chu pawi a tiin Mizo hnam leh democracy zahlohnaah a ngai a, 2 Assam Rifles a dem takzet tih a sawi.
‘MNF Legislature Party chuan kan ram, kan hnam leh democracy zahawmna humhim a, a mawhphurhna hlen ngei turin Mizoram sawrkar a phut a ni,’ a ti.
Congress MLA C Ngunlianchunga pawhin kan ram chhunga Assam Rifles inlulin dan chu inhnuaichhiahna nia a hriat thu leh ngawihbo chi a a ngaih loh thu a sawi.
Assam Rifles-in minister chhaih buaiin a zinkawngah harsatna an siamsak tih sawiin, “Mizoram hi rambuai a niloa, kan minister hial harsatna an siamsak hi hnam anga inhnuaichhiahnaah ka ngai,” a ti. Assam Rifles hian hetianga minister chunga an chet chhan hi mipui hnena puangzar turin a phut tih a sawi a. A chhan an sawifiah theih nan sawrkarin hma la se a duh tih a sawi a ni.
Minister F Rodingliana chuan tih buai a nih chungchangah larsap hnenah an thlen dawn a, khawtlang pawhin an ni’n avangin mipui tan harsatna an nih lohna turin an thlen vek dawn tih a sawi a ni.