Assam tuilianin zual lam pan zel

Assam tuilian chuan zual lam pan zelin tuilian hian district 29 ah mihring 16.50 lakh vel te chu a tibuai hneh hle a. Luipui te chuan hlauhawm chhinchhiahna an pel vek tawh bawk.
Kamrup (Metro) district-ah chuan Brahmaputra, Digaru leh Kollong river ten hlauhawm chhinchhiahna an pelh vek tawh avang leh ram zau tak a chim tawh avangin inralring tura tihna tihchhuah a ni a.
Ningani khan Chief Minister Himanta Biswa Sarma chuan tuilianin a khawih nat zualna Maligaon, Pandu Port leh Temple Ghat area, Guwahati Metropolitan area huamchhunga mite chu a tlawh a ni.
Nilai zan khan Sarema chuan District Commissioner tin te nen tuilian chungchang sawihona neiin August 15 hma ngeia dan anga tanpuina pek tur leh chhawmdawlna kaihhnawih te information dik tak nena tifel vek turin a ti.
Ningani atang khan tuilenna hmun tinah Cabinet minister te pawhin ni thum chhung an chamchilh dawn bawk a.
Kumin Assam tuilian, leimin leh thlipui avangin mi 56 in nunna an chan tawh a, mi pathum an chin hriatlohin an awm mek bawk.
Tuilian hian Barpeta, Biswanath, Cachar, Charaideo, Chirang, Darrang, Dhemaji, Dhubri, Dibrugarh, Goalpara, Golaghat, Hailakandi, Hojai, Jorhat, Kamrup, Kamrup Metropolitan, East Karbi Anglong, West Karbi Anglong, Karimganj, Lakhimpur, Majuli, Morigaon, Nagaon, Nalbari, Sivasagar, Sonitpur leh Tinsukia district te chu a khawih na zual deuh a.
Dhubri chu tuilian tuar nasa ber niin 2.23 lakh vel te chu chenna mumal nei lovin a siam mek a, Darrang in zuiin 1.84 lakh te a tibuai hle a, Lakhimpur-ah pawh 1.66 lakh vel te chu tuilian han a tibuai a ni.
Brahmaputra chu Nimatighat, Tezpur, Guwahati, Goalpara leh Dhubri-ah te hlauhawm chhinchhiahna chungah a la luang mek a. Brahmaputra fintu Subansiri chu Badatighat-ah, Burhi Dihing chu Chenimari ah, Dikhou chu Sivasagar-ah, Disang chu Nanglamuraghat, Dhansiri chu Numaligarh leh Kopili chu Kampur leh Dharamtul-ah te hlauhawm chhinchhiahna chungah an la luang vek bawk a.
AP Ghat, BP Ghat, Chota Bakra leh Fuletrak-ah te Barak River pawh hlauhawm chhinchhiahna chungah a luang a. Barak fintu Dhaleswari pawh Gharmura, Katakhal pawh Matizuri leh Kushhiyara pawh Karimganj-ah te hlauhawm chhinchhiahna chungah an luang bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More