ATP Finals 2023 tan a ni

On Nov 13, 2023 9 0

Kum tawpa Tennis inelna lian leh ngaihhlut hlawh APT Finals 2023 chu November 12, Pathianni zan khan khelh tan a ni. ATP Finals 2023-ah hian champion lai Novak Djokovic chuan Worl No. 1 ni chunga kum khar turin vawi khat chak chiah a mamawh.
Kum khata chetha zual mi pariatte inelna ATP Finals-ah hian vawi ruk champion tawh Novak Djokovic leh Roger Federer te chu champion ngun ber a ni mek a. Champion tura rinkai ber ni chunga inlan Djokovic hi a champion nawn leh thei a nih chuan Federer record khumin, champion ngun ber a ni ang.
ATP Finals mimal inelna bika vawi 54-na hi Italy khawpui pakhat Turin-ah khelh a ni a, Pathianni zan dar 7:00 khan khelh tan a ni. Player pariatte hi Group hnih; Green Group leh Red Group-ah then a ni a ni. Green Group-ah Novak Djokovic (1), Jannik Sinner (4), Stefanos Tsitsipas (6) leh Holger Rune (8) te an awm a. Red Group lamah Carlos Alcaraz (2), Daniil Medvedev (3), Andrey Rublev (5) leh Alexander Zverev (7) te an awm ve thung. Novak Djokovic, Stefanos Tsitsipas, Daniil Medvedev leh Alexander Zverev te hi he inelnaa lo champion tawhte a ni a. Carlos Alcaraz leh Holger Rune te hi ATP Finals an inlan vawi khatna a ni ve thung.
Mipa lamah hian No. 1 ni chunga kum khat turin Novak Djokovic leh Carlos Alcaraz te an inel fal mek. ATP finals-ah hian Djokovic a chak loh vek laia Carlos Alacaraz a champion a nih chuan Spaniar hian point 10 in Djokovic a lehpel ang a, No. 1 ni chungin kum a khar thei dawn. Hetihlai hian Djokovic hian vawi khat lek pawh hnehna a chang a nih chuan Alcaraz tan lehpelh theih a ni dawn lova, a vawi sarih nan No. 1 ni chungin kum a khar thung ang. Sinners leh Tsitsipas te hi Djokovic-a hneh than tak mai an ni a, a champion em lo a nih pawhin vawi khat na reng reng chu Djokovic hi a chak a rinawm viau thung.
Grand Slam lo vekah chuan ATP Finals hi inelna lian leh ranking point pawh keng tam ber a ni a, champion tan point 1500 hlawhchhuah tur a awm a. Champion hian sum fai $4,801,500 (group match ah pawh a chak vek a nih chuan) zet a hum haw thei dawn bawk.