ATP tennis debut nghak mek Forlan

ATP tennis debut nghak mek Forlan
Professional footballer-te zingah football khelh an bansan hnua infiamna danga professional luhchilh zui leh sawi tur an lo awm zauh zauh tawh thin a, chuti ang mi kan hmuh tharlam ber chu Manchester United striker hlui Diego Forlan kha niin, thla thar hian an ram Uruguay lama ATP doubles event-ah a professional tennis debut a khel dawn.
Kum 45 mi ni ve tawh Forlan hian kum 2019 khan football khelh a bansan a, chu mi hnu chuan coaching lam emaw luhchilh zui loin tennis a khel ta zawk a, Montevideo khawpuia Uruguay Open-ah hian Argentine Federico Coria nen doubles-ah an tangdun dawn a ni.
Forlan hi rawlthar a nih lai pawhin promising tennis player a ni a, mahse, tennis lama kal ta loin football a luhchilh a, tah pawh chuan player hlawhtling tak niin, ram tana goal khungtu pawimawh a nih piahlamah khawvela football club lar ber pawl zinga tel pha Manchester United striker a ni thei ngat a ni.
ATP tour lama bul a tan hma hian ITF Masters event-ah chuan khelmual a lut nual tawh a, a hnaivai ber chu kum 45 chin leh a chunglam category-ah a khel.
Thla thar tournament a nghah mek hi chu recognised ATP event a ni tawh a, second-tier Challenger Tour niin, tah hian wildcard hmangin a inlan dawn a ni.
A kawppui tur Coria hi ATP singles ranking lamah pawh world number 101-na ni pha a ni a, a career-a a tawnsan ber lai nikum mai khan No. 49 hial a han kai pha a ni.
Forlan hian kum 2002 khan Old Trafford club zawmin, La Liga club Villarreal lama a insawn hma thleng khan Manchester United tan game 98 a khel tling.
Spain ramah Forlan khan tum hnih ngawt Europe-a goal khung hnem berin an dawn thin European Golden Shoe award a dawng zui nghe nghe.
Ram tan pawh a thawhhlawk a, South Africa ramin 2010 World Cup a thlen tum khan he forward Uruguay chu pathumna nihpuiin, thiam ber lawmman Golden Ball a dawng a; a ram chu 2011 Copa America title a lakpui tawh bawk.