Australia white-ball captain Aaron Finch chuan international cricket a chawlhsan thu a puang.
-- Advertisement --
Australia T20 captain hlui hian 2022 Men’s T20 World Cup-ah khan Ireland lakah run 63 siamin, kha kha a international innings hnuhnung ber a ni zui ta a ni.
Kum 36 mi opening batter Finch hian nikum September thla khan one-day internationals a lo chawlhsan tawh a, tunah international cricket pumpui atangin a kalbo ve dawn ta tih thuchhuah siamin a tarlang.
Australia tan Test vawinga, one-day international match 146 leh T20 match 103 khel tlingin, an ram chu kum 2021 khan a vawikhatna atan T20 World Cup title a lakpui.
Finch hian Australia tana a khel kha a tan chawimawina a nih thu sawii chungin kum 2024 T20 World Cup thleng a khel thei tawh dawn lo tih a inhriat hnuah tun hi chawlh hun dik tak nia a ngaih thu a sawi.
Melbourne Renegades team tan tualchhung T20 competition hrang hrang lamah erawh a inlan chhunzawm dawn a, a tournament khelh tur zingah hian Big Bash League a tel.
Mipa T20 bikah run 3,120 siam tlingin Finch hi he cricket khelh dan (format) tawi berah hian Australia player zinga run siam hnem ber niin, all-time ranking erawh parukna a ni thung.
T20 international-ah century vawihnih siamin, a average chu 34.28 a ni a, a strike rate chu 142.53 a ni.
ODI bikah run 5,401 ngah tlingin, century tum 17 a siam a; a average chu 39.13 niin, kum 2015 khan 50-over World Cup trophy latu Australia squad-ah a tel.
Finch hi men’s T20 international-a score hnem ber niin, kum 2018 khan Zimbabwe an hmachhawn tumin ball 76-ah run 172 a hlapchhuak tling a; kum 2013-a England laka run 156 vawchhuaka record chu a lo siam tawh a khum.
T20 international-a six tum 125 hlapchhuak Finch aia six ngah awmchhun pahnih chu India star Rohit Sharma (182) leh New Zealand mi Martin Guptill (173)-te chiah an ni.
ODI-ah Finch hian match 55 chhung Austraia captain nihna changin, T20-ah match 76 a captain bawk.
Nikum khan international-ah a chefuh hlei thei lo a, ODI-a a average chu 12.42 chiah niin, T20 lamah 28.44 a ni chauh bawk