Melbourne Park-a Australian Open khelh tan ni Thawhtanni khan Australia leh New Zealand rama Ukraine amba-ssador Vasyl Myroshnychenko chuan hmeichhe singles first-round match pakhata a chipui nula Kateryna Baindl in-khel lai a hmunah a thlir a, a thutna hnung thingbuka Russian flag intar chu Twitter-ah phochhuakin, tournament buatsaihtute hnenah complaint a thehluh zui nghal a, chumi bawhzuiin, Melbourne Park-a Russian leh Belarusian flag lekchhuah hrim hrim an khap zui ta a ni.
-- Advertisement --
Ukrainian tennis player Kateryna Baindl inkhel a tawiawm laia a hnunga an ram khawihchhe kal mektu Russia hnam puanzar lo lang chungchangah Myro-shnychenko a thinrim hle a; Twitter-a thlalak a tarchhuah hnuaiah a lung-awilohna ziakin, “Kan nula inkhelh laia Russian flag intar kha ka dem takzet a, Tennis Australia hi an ‘neutral flag’ policy kalpui nghal turin ka phut a ni,” a ti.
Thawhlehni khan Tennis Australia chuan thuchhuah siam zui nghalin, Australian Open khelhna hmun tawh phawta ram pahnih tarlante hnam puanzar phochhuah khana thupek a chhuah.
Tennis Australia thuchhuah chuan, “Kan policy hmasaah chuan fans lamin an duh anga an hnam puanzar ken hrim hrim chu phalsak an ni a, mahse, midang tan buaina leh harsatna an thlen tur a ni lo tih dan zeh tel a ni.
“Nimin khan court sira flag pakhat tarchhuah a ni a, Russia leh Belasur hnam puanzar reng reng Australian Open khelhna hmuna kenluh khapna thupek tihchhuah nghal niin, player leh fan-te’n boruak nuam leh hlimawm tak hnuaia tennis chauh an buaipui theihna turin hna kan thawk chhunzawm zel ang,” tiin.
Nikum atang khan Russia chuan a thenawm Ukaraine chu sipai chakna hmangin a run chiam a, Moscow lam chuan he inrunna hi indona tia sawi duh loin ‘special operation’ a ti lui ngar ngar a, tun thlengin he indona hian tawp lam a la pan thei lo.
Belarus chu Russia thlawptu ram leh puitu ram niin, Ukraine an do avang hian infiamna lamah Russian leh Belarusian infiammite’n nasa takin an tuar mek a, nikum Wimbledon-ah phei kha chuan Russian leh Belarusian player tawh phawt tel phalsak an ni lo a; kumin Australian Open-ah erawh ram behchhan sawiri loin mimal zawna tel ngawk phalsak an ni thung.
Australian Open-a hian mimal anga tel phalsak ni mah se ram pahnih player-te inkhelh lai hian an ram hming ve vete chu TV lama player hming tarlan laiin phochhuah ve phalsak an ni lo a, draw sheet lamah pawh an ram hming dah a rem lo.
Belarusian fifth seed Aryna Sabalenka chuan Ukrainian player-te rilru a tihnat theih dawn avanga ram pahnih hnam puanzar tarlan a rem lo chu a hriatthiam thu Thawhlehnia first roud a paltlang hnu khan sawiin, “Sport leh politik hian inzawmna a nei tur a ni lo tih hi ka ngaihdan nghet tlat a ni a, Tennis Australia-in tuna thutlukna a siam hi an rilru damna tur a ni a, a tha e. A ti theitu lamin an tih chuan keini lamin engnge sawi theih kan neih ang? Engmah tih theih kan nei lo,” a ti.
Ukraine number two Marta Kostyuk chuan Thawhtanni khan Reuters hnenah Russia leh Belarus player-te chibai a tum loh thu a sawichhuak.