Billboard Top Artists of the 21st Century Chart-ah Taylor Swift a No.1

Billboard-in kum zabi 21-na kum hmasa lam, kum 25 chhunga artist ropui zual 100 a thlan chhuahah Taylor Swift chu No.1 a ni. Billboard Top Artists of the 21st Century chart hi Billboard 200 (albums) chart leh Billboard Hot 100 (singles) chart-a kum 2000 leh 2024 inkara zaithiamte chet that dan atanga tehin ranking hi an siam a ni.
Taylor Swift hi Billboard chart-a a lan hmasak ber chu July 2006 kha a ni a, chutih lai chuan tleirawl kum 16 chauh niin, a debut single ‘Tim McGraw’ chu chart-a a rawn lanpui ve det det a, mahse, tunah chuan Billboard Hot 100 (singles) chart-a No.1 kai thei hla 12 a nei tawh a, Billboard 200 (albums) chart-a No.1 kai thei album 14 nei tawhin, hmeichhe zaithiam zinga No.1 album ngah ber a ni bawk.
November 2022 khan Swift hian Billboard Hot 100 chart record siamin, a album ‘Midnights’-a hla te chu Billboard Hot 100 chart top10-ah tum khatah an lang rual thup mai a, hetianga Billboard Hot100 top 10 tum khata luah vek thei zaithiam awmchhun a la ni.
Taylor Swift hi Billboard-in kum khat chhunga zaithiam chetha ber kumtawpa an thlan thin year-end Top Artist chart-ah pawh 2009, 2015, 2023 leh 2024-ah No.1 a lo ni tawh a, he chart-a kum li No.1 ni thei awm chhun a la ni bawk.
Billboard Top Artists of the 21st Century Chart:
1- Taylor Swift
2- Drake
3- Rihanna
4- Post Malone
5- Eminem
6- The Weeknd
7- Beyoncé
8- Justin Bieber
9- Bruno Mars
10- Usher