Bail-a chhuah i nih pawhin file i khawih thei lovang : Apex Court

Arvind Kejriwal chu ‘pawikhawih hrat a ni lo’ tiin Supreme Court chuan Delhi Chief Minister tuna money laundering case a Tihar Jail a tang mek bail a nih leh nih loh tur ngaihtuahna neihnaah a sawi a.
Apex Court chuan Kejriwal-an amah an manna a khinna ngaihtuahnaah a hma pawhin Lok Sabha election kal mekah AAP leader chu campaign a neih theih nana bail a remtihsak mai theih thu a lo sawi tawh bawk a. Delhi-ah hian Lok Sabha seat pasarih a awm a, inthlan hnuhnung berah khan BJP ten an la fai vek a, kumin inthlanah hian May 25 ah Delhi a inthlang dawn a ni.
Court chuan Arvind Kejriwal chu ‘national capital elected Chief Minister a ni’ tia bul tanin, “Inthlan a awm mek a, hun danglam leh pawimawh a ni a, amah hi thiltisual fo a ni bawk lo” tiin bench of Justice Sanjiv Khanna leh Justice Dipankar Datta te chuan an sawi a.
“Inthlan awm lo se chuan interim bail a chhuah ngaihtuah ngai hauh lo tur a ni,” tiin Justice Datta chuan a sawi bawk a.
Mahse court chuan Enforcement Directorate tena Chief Minister chu Delhi liquor excise policy siam nana meizanghlaptu ber an tih hnuah vau lawk thungin, “Kan chhuah che a nih chuan inthlanah i inhnamhnawih remtih a ni dawn a, official duty i tih phalsak i ni dawn bawk a, chu chuan nghawng hrang hrang a nei thei dawn a ni” tiin a sawi a.
Senior advocate Abhishek Manu Singhvi, Kejriwal aiawh ding chuan a client chuan ‘he excise case kaihhnawih thil engmah khawih a nei lovang’ a ti thung a.
“Kan sawi chian duh chu, kan chhuah zalen che a nih chuan official duty engmah i tih kan duh dawn lo” tiin court chuan sawiin, “sorkar function thilah inrawlhna i neih kan duh dawn lo,” a ti bawk.
Singhvi chuan court chu tiamin Kejriwal chuan statement siamin ‘file pakhatmah a sign lo ang’ tiin a chhang zui a ni.
A hmain ED te chuan court hnenah Kejriwal interim bail chu an duh lo tiin an sawi thung a. Central agency aiawha ding Additional Solicitor General SV Raju chuan AAP leader chhuah zalen chuan example chia a thlen dawn a ti a.
“Example chhe tak kan siam dawn a ni. Midangte chu an pawimawh lo zawk tihna em ni? Chief Minister a nih avangin ngaih pawimawh bik a nihna tur a awm lo. Politician te chu kan huam tel tir dawn lo bik tihna em ni? Election a campaign chu a pawimawh zawk tihna em ni?” tiin ED lawyer chuan court hnenah a sawi thung a.
Chu chu chhangin court chuan ‘politician crime a inhnamhnawih te chu ngaihhnathiam bik a rem ti lo’ tia sawiin mahse zau zawka thlir a ngai a ni ti thungin, Kejriwal chuan 2024 Lok Sabha inthlan dawn hma chiah karah chiah man a ni tlat a ni a ti ve thung.
AAP leader lawyer te chuan chu chu thupui pakhatah nei bawkin Arvind Kejriwal man hun chu sawiselin ‘Vote khat pawh thlak a nih hmaa AAP tihchhiat tumna’ an ti ve thung.
Chutih rual chuan court chuan Kejriwal chu ED hmaa insawifiah tura koh tum kua lai a kal duhloh hnua man a nih chauh thu a hriat tho thu a tarlang thung.
Delhi CM Arvind Kejriwal bail chung chang hi court chuan May 9 ah emaw a ngaihtuah leh dawn a ni.