Bana Kaih hnuaiah kuhva dah

Bana Kaih hnuaiah kuhva dah
Sawrkarin Bana Kaih hnuaiah kuhva a dah a, tunlai thiamna hmanga leilung mila kuhva enkawl dan an ngaihtuah mek tih Land Resources Soil & Water Conservation minister Lalthansanga chuan a sawi.
Mizoram Kuhva Chingtu Pawl Mamit District Hqrs chu Thawhtanni khan Mamitah an inkhawmpui a. Hmanpuitu LRS&WC minister hian, an sawrkar tirh phatah kuhva chingtuten harsatna an tawk nghal a, chief minister-in kuhva chingtute hi progress partner-ah a puang a, kuhva chingtuten sawrkar atangin tanpuina a tam thei ang ber an hmuh theihnan hma an la chho zel tih a sawi.
“Kuhva hi thiamna sang zawka enkawl a nih theihnan Hand Holding hnuaia dah a ni a, kuhva chingtuten harsatna kan tawhte soil engineer-ten zirchiangin, heng harsatna hi chinfel a nih theihnan rim takin hna an thawk a ni. Thlai dang ang a ni loa, uluk taka chin leh enkawl a ngai a, mithiamten tih dan tur an tih ang zelin tih hram a tha a ni,” a ti. Kuhva chingtute hamthatna sawrkarin a ngaipawimawh a, tunlai thiamna – scientific method leh khawl thiamna hmanga kan leilung mila kuhva enkawl that ngaihtuah a ni mek tih a sawi bawk.
Mamita kuhva chingtute chu district dangte tana entawntlak khawpa thawk turin a chah a. Chumi tur chuan tanrual leh intelthat a ngai a, hmasawnna tam tak a thlen thei tih a sawi a ni.
MKChP Mamit District Hqrs hi 2024 February 20-a din a ni a, member hi chhungkaw 350 chuang niin an pung zel. Kuhva an phun zawng zawng hi nuai 10 chuang niin kum 2023- 2024 khan cheng nuai 40 chuang an lalut a ni.