Bana Kaih Scheme Phase II tan Monitoring kan uluk zual dawn – MSPCC vice chairman
Mizoram sawrkar flagship program ‘Bana Kaih Scheme Phase II’ tan a ni a. A tlangzarhtu Mizoram State Policy Coordination Committee vice chairman Dr KC Lalmalsawmzauva chuan Phase II-a bana kaihte hmalak dan chu an vil uluk zual dawn tih a sawi.
Bana Kaih Scheme Phase-II hnuaiah hian khawpuia cheng, thiamna leh theihna nei sa, bultan tumte leh hmalak tawhna tih changtlun tumte kaih chhuahna tur loan component-a awm bakah kuthnathawktute kaih chhuahna tur ‘market handholding support’ a awm avangin, mi taima leh tumruh tan ram tih hmasawnna tura hmanraw tangkai tak a ni tih a sawi.
Bana Kaih Scheme-a loan component leh Chief Minister’s Special Package chu a thlawna sem a ni lo tih adviser to chief minister ni bawk Dr KC Lalmalsawmzauva hian sawiin, “Bana Kaih hi Sekibuhchhuak a ni loa, tuthlawh leh chem a mamawh a, taimakna nena hlawhtlinpui tur chi a ni. Phase II-ah hian monitoring kan uluk zual dawn a. Thil semin kan inpe tawrh fo thin a, enfel leh vil zui a awm loh thin avangin a hlawhtlin tur angin a hlawhtling lo fo thin,” a ti.
“Kha leh chen kha chaw nem kan lo inbarh tawh thin a, tunah erawh chaw rum kan inbarh mek a, helh deuh pawh an awm ang; mah se, kan puarpui rei zawkin kan ring,” a ti bawk.
MSPCC vice chairman chuan Phase-I kalpui chhung khan kuthnathawktute hmalakna azarah buaipui tham sawhthing thar chhuah a ni a, sawhthing leina atan cheng vaibelchhe 95.63 pek chhuah a ni, tiin, mi pamham leh dik lo tlemte avangin sawhthing man inpek chungchangah harsatna an tawk tih a sawi a ni.
Bana Kaih Scheme:
8 Phase -I kalpui chhung khan loan component dilna 11439 dawn atangin 702 chu loan dawng tura pawm a ni tawh a. Loan pek tura pawm tawh belhkhawm hi cheng vbch. 76.35 niin, chawhrualin mi phakhat hnenah Rs. 10,87,000 ang zela pek tur a ni.
8 A dilna bank azirin loan hi sem chhuah mek a ni a, PMEGP portal siamthat avangin loan pek chhuah hi a khawtlai phah a ni.
8 Phase-I ah hian Chief Minister’s Special Package diltu mi 29571 dilna chu a changtu department-a thawktuten an endik hnuah, mi 2258 hnenah pek a ni a. Sum pek chhuah belhkhawm chu vbch. 18.33 a ni.
8 Phase-II ah hian dilna hi online-a thehluh tur a ni a. CM Special Package dilna pawh online a kalpui tum tho a ni. Dilna thehlut thiam lo tan Block Development Office, Sub-Divisional Office, Deputy Commissioner Office leh Common Service Centre- hman tangkai tur a ni
8 Phase-II ah hian implementing department 19 an awm tawh dawn a, dilna felfai taka thehluh a nih theihnan DPR software siam a ni tawh. Mi tam zawkin tangkai taka Bana Kaih Scheme hi an hmalakna tih changtlunna atan leh tihhmasawnna atana an hman theihnan CM Special Package hi Rs. 50000 thleng pek theiha thlak danglam a ni. Ran vulh tan loan limit cheng nuai 10 thleng a ni tawh dawn bawk.