Bangkok in sak lai chimah mi 12 thi tawh

Bangkok in sak lai chimah mi 12 thi tawh
Thailand khawpui, Bangkok-a lirnghing avanga in chhawng sang sak lai chim chhe kar atangin ruang pakhat lak chhuah leh a ni a, he in chima thi chu mi 12 an tling ta.
In sak laia thawktu chin hriat loh mi 75-te chu ngawrh taka zawn mek zel niin a chim tlusawp karah hian an awm rin a ni a. Thailand-ah hian lirnghing avanga thi hi 19 an tling ta bawk.
Bangkok-a Deputy Governor Tavida Kamolvej chuan scanning machine leh ui fing nen mi zawn hna hi thawh a nih thu a sawi a. Chhanchhuah hna thawktute chuan mihring dam an la awm beiseiin an rin lai an dap zel a ni.
Darkar 72 lai a liam tawh avangin dam an awm beiseina a chau tawh hle tih a sawi a, thawktute pawhin a chak thei ang berin an thawk tih a sawi.
“Kan che thuai thuai a. Darkar 72 liam tawh mah se kan tawpsan dawn lo,” a ti.
Magnitude 7.7-a nain Zirtawpni chhun khan Myanmar-a khawpui lian ber pahnihna, Mandalay bul lawk atanga intanin a sawi a. Myanmar-ah phei chuan chhiatna a thleng nasa hle a ni.