Bangladesh-ah dengue a leng, ni khata thi tam ber ni thleng
Bangladesh-ah dengue vei an pung hluai a, damdawi ina thawktute chuan kumin chhunga he natna avanga ni khata thi leh damdawi ina dah luh ngai an tam ber ni an thleng tih an sawi.
Thosi atanga darh natna avang hian Inrinni chawhnu leh Pathianni chawhnu inkarah khan mi 12 thiin damdawi ina dah luh mi 740 an awm bawk tih Directorate General of Health Services chuan Pathianni khan a puang a. Kuminah hian dengue avanga thi mi 179 awm tawhin mi 42,000 kai an awm tawh.
Damdawi inah naupang an tawp hle a, khawsik sang tak, ruh chuktuah na leh tui tlachhamin an awm a. Mi dang thenkhat chuan hei bak pawh na an nei.
“Naupangte hi rang taka an taksaa tuiril awm hloh thei an ni a, hei tak hi a hlauhawm em em chhan a ni,” tiin physician ABM Abdullah chuan a sawi a, nu leh pate chu an an fate zingah khawsik emaw, an hahni thi emaw an awm chuan damdawi in panpui thuai zel turin a chah.
Entomologist-te chuan sik leh sa inthlak mekah dengue hi a darh chak zual tih an sawi a. “A nih dan pangngai aiin fur hun a rei a, hei hian hmun tinah tui tling a titam zual a ni,” tiin Jahangirnagar University-a Zoology professor, Kabirul Bashar chuan a sawi.
“Fur rei lutuk hian tho si puan theihna hun rei tak a siam a, hri leng pawh hi a darh chak phah em em a ni,” a ti bawk.
Bangladesh hi an khawsak phung changkang tak an nih rualin bawlhhlawh sawngbawlna lamah an pachhe em em a, in sakna hmuna tui thianghlim lo tling a tam a, hei hi thosi pian duhna hmun a ni.
Damdawi ina natna nei inentir leh dah luh an pung nasa a, doctor-te chuan hun rei vak lo chhungin buaina nasa zawk an tawn an hlau hle.
Dengue bakah hian chikungunya vei pawh an pung mek bawk a. Dengue ang lo takin chikungunya hi a vei an tam lo va; mahse, naupangah pawh, puitlingah pawh thihna a thlen awlsam em em a, a veite hi an ruh chuktuah a na a, an taksa a chak lo hle thin bawk.
Bangladesh-ah hian dengue vanga an buai ber tum chu kum 2023 kha niin mi 1,705 thiin mi 3,21,000 chuangin an vei a. Mi thiamte chuan a invenna lam tihchak a nih loh chuan a la len chhunzawm zel theih thu an sawi.