Bangladesh atangin raltlan pung zel

Bangladesh-a Chittagong Hill Tracts atangin
Mizoramah raltlan an pung a, pung nasa tia sawi tur ni lo mah se tlem tlemin thleng thar an awm ve reng.
BSF an duty ngawrh avangin Chittagong-a Zo hnahthlakte chu Mizoramah tlanchhe duh mah se an duh angin an lut thei lo a, chhuak zeta kir leh te pawh an awm. Hei vang hian raltlan hi an pung chak lo zawk nia sawi a ni.
Sorkar chhinchhiah danin, Bangladesh atanga raltlan hi 773 an ni a, amaherawhchu, la chhinchhiah loh engemaw zat an awm tih thu dawn a ni.
Lawngtlai bawrhsap office-in an chhinchhiah dan chuan, raltlan hi mi 773 an ni a, puitlingah mipa 242 leh hmeichhia 229 an awm. Kum 18 hnuai lam (naupang) mipa 174 leh hmeichhia 128 an awm bawk.
Lawngtlai bawrhsap office hian raltlante hi fel takin an chhinchhiah a, mahse lut thar, la chhinchhiah fel loh hi an awm ve deuh reng tih thu dawn a ni.
Raltlante tanpuitu pawl, Bangladesh Refugee Committee, Mizoram te chuan raltlan hi sang an chuang tawh niin an sawi a, sorkarin a la chhinchhiah loh, lut tharte nena chhiarin mi 1098 an ni tawh tih an sawi.
Nilaini khan Bungtlang South-ah chhungkaw 10 an lut thar leh a, a lu nunga chhiarin mi 38 an ni. Anni nena chhiar chuan mi 1136 an tling ang.