Minister hlui KS Thanga’n Congress party a bansan

An party president rorel dan leh chet lak dana lungawilo, MPCC general secretary leh MPCC Boundary Committee chairman ni lai KS Thanga chuan June 9 khan party atanga banna a thehlut a. A rual hian party mi thenkhat pawhin banna an thehlut ve bawk.
MPCC president Lalsawta hnena banna lehkha a thehluhah hian KS Thanga chuan point 7 a ziak a. An party president Pu Lal Thanhawla paihthlak tuma phiarru nasa ber zinga tel, term pawh hmang zo lo tura nawrtu, chuta a hmatheha a hman party senior leader-te pawh a hnua thlauhthla leh tho niin a sawi.
Cheng nuai 25 pek let chungchang Lalsawta sawichhuah tawh chu KS Thanga hian rawn sawichhuakin, ‘He thilah hian i thianghlimna lantir i tum hi chu thudang a ni a, midang tihbawlhhlawh i tumna hi chu a puitlin loh thlak hle,’ a ti a. In sa lai a nih avanga sum a (Lalsawta) a mamawh laiin, anmahni duhsaktu hnenah a lo thlensak hnu ah, ama (KS Thanga) in Luangmualah ngei Lalsawta hi kalin, cheng nuai 25 hi a hawn tih a sawi.
A lo mamawh leh loa, a pe let a nih pawhin a petu leh ngaihtuahsaktute timualpho tel zawnga a ti chu sim se a duh tih hrilhin, ‘I thianghlimzia tarlan nana thiante thianghlim lo anga i tarlan duhna hi i mualpho zau lohna’n sim daih rawh,’ a ti. Education minister a nih laiin SSA hnuaia thil supply hnaah Congress hruaitu pakhat vur bik neia puhin, hengte hi ‘That Loh Theih Lohna Bawm’ ah an leng vek tho nge, tih KS Thanga hian a zawt a. A insawi angin a kal em, tih inzawt turin a chah.
Minister a lo nih reng tawhna Congress sawrkar, miten chhe lailet dera chhuaha an beih laiin, amah chauh mi tha anga intarlan tumin sawrkara a thawhpuite thlavang hauh duh lo leh, bawlhhlawh lo anga inlantir tumah Lalsawta hi KS Thanga hian a puh bawk a. Congress sawrkar laia an thil tih that ve pawh sawi phal loa party mite hup beh tumah a puh.
President nihna hmangsual leh party dan lo anga, Political Affairs Committee kalpui leh thiatah KS Thanga hian a puh a. NLUP sem kha duh lo anga insawi zet a, a hnuah Tang Puihna a zawrhah nuai hnih sem zuar tel leh si ah puhin, ‘Hei hian principle mumal tak neia party i kaihhruai loh zia a tilang,’ a ti.
President nihna chelha a kaihhruaina hnuaiah rinawm taka a awm zui zel laiin, thil awm dan thlirin, huikhawm lam aia inthendarhna lam kawng an zawh tak zel avang leh Congress president ni tura bul a tan dan hrim hrim a chhutin, ram rorel tak tak tur atan Pathian malsawmna dawng tlak nia a hriat loh avangin, insiamthatna kawng khat tal a neih theihna’n party a chawlhsan tih a sawi a ni.
Congress sawrkar laiin KS Thanga hi parliamentary secretary a nih bakah minister of state a ni hman a ni.