BAO pek kir ngiatin N Vanlaiphaia MNF Unit panga-in banna thehlut Mizoram sawrkarin N Vanlaiphai atanga E Lungdara Block Agriculture Office (BAO) a sawn avanga lungawilohna leh sawnlet tura phutna kal zelah N Vanlaiphaia MNF parety unit panga ding hruaitute chuan Thawhlehni khan an party hruaitute hnenah an seal an thehlut a. Hemi chungchanga indawr zui an duh a nih chuan an khawtlang NGO lam be turin an chah nghal. N.Vanlaiphaia MNF Unit panga - Bangla Veng, Rahsi Veng, Venglai, Rawlkhang leh Forest Veng Unit chuan an khuain sawrkara an thil ngiat tihhlawhtlin sak an nih loh avanga lungawiloh lantir nan MNF Gen. Hqrs. vice president Lalthlengliana hnenah March 28 khan an seal an thehlut a. "N.Vanlaiphaiah hian khawtlang phalna lo chuan MNF Unit a ding tawh loa, a tul a nih chuan khawtlang hruaitute dawr mai turin kan hriattir a che," tiin an lehkhaah chuan an tarlang.
Mizoram sawrkarin kumin January 31-a N. Vanlaiphai atanga E.Lungdar-a BAO sawnna order a lo siam tawh chu sut turin N Vanlaiphai khawtlang aiawhte chuan vawi engemawzat sawrkar an lo ngen tawh a. Thawhlehni vek hian an khuaah total bandh neiin, mipuiin an thlawp that avangin chawhnu dar 1.00 ah an hlip a ni. Kumin February 1 khan an khuaah kawngzawh an huaihawt tawh bawk.
-- Advertisement --
N.Vanlaiphai atanga seal thehlut tura Aizawla kalte hi Thawhtanni khan MNF vice president Lalthlengliana chuan lengah sawmin, an thil ngiat chu tun tumah chawp leh chilha tihhlawhtlin mai theih a nih loh thu a sawi a. N Vanlaiphai Primary Health Centre chu Community Health Centre-a hlankai a lo tiam thung niin The Aizawl Post chuan thu a dawng.
Hetianga inremsiam tura an inthen hnu hian, N.Vanlaiphai Joint Action Committee chuan inremsiamna hi an duh dan a nih loh thu leh, seal an thehlut lo a nih chuan khawtlang mipuiin pawndum nen an lo hmuah tur thu an sawi a. Hei vang hian Thawhlehni khan thawkchhuak ta lehin, MNF Gen. Hqrs. treasurer K Vanlalaua hnenah seal hi thehluh an tum a, a lo dawn sak theih loh avangin, party vice president Lalthlengliana chu Hnam Runah koin, ani’n a lo dawnsak ta a ni.