Barca hmahruaina chhah zel
Nilaini zana Real Betis khelmual lut Barcelona chuan 2-1 hnehna nen Spanish La Liga table-a an hmahruaina an sawhnghet a, league khelh 19-ah point 50 nei tawhin, anmahni hnaihbertu Real Madrid chuan he thu buatsaih lai thleng hian khelh 18-ah point 42 an kawl a, hmahruaitu team pahnih hi point riat ngawtin an inthlau tawh.
Catalan team goal hmasa zawk hi second half tir lam minute 65-a Raphinha tihluh niin, nikum nipui thawt laia Leeds United atanga pound maktaduai 55 zet senga an leichhuah hnu khan a club thar tana game 28 a khelhah goal nga a tilut tling chiah a ni.
Rapinha goal a chhuah hma hian Betis goalkeeper Rui Silva chesual duh loin Pedri goal tur vawithum ngawt a dansak a, a hnuah Alejandro Balde cross atanga Raphinha goal a dang zo ta lo a ni.
Minute 20 a la awm tihah La Liga top goalscorer ni mek Robert Lewandowski chuan season kal laia a league goal 14-na chu Ronald Araujo thawhrah atangin a khung ve leh.
Minute nga a kal leh tihah Betis-in an siphurh pakhat zawk an sut then a, he goal hi Jules Kounde ‘own goal’ niin, minute nga hun pekbelh a liam ruala referee a hnial dan uchuak avangin Betis midfielder William Carvalho chu red card hmanga hnawhchhuah a ni.
An kawtkaia point thawk-chhuak zo lo Real Betis hian table-ah parukna luahin, hmahruaitu team nen hian point 19 ngawtin an inthlau tawh.
Nizan result tarlan hman lohah Real Madrid chuan Valencia an mikhual a, an chak chuan Barca nena an inkar chu point ngaah an dahkir leh thei ang.