Pathianni zanah Spanish La Liga table-a hmahruaitu Barcelona leh an hnuai chiaha Catalan team tawlhtluk hun chang ve reng Real Madrid-in an tumpui ve ve hnehin Spanish club ropui pahnih hi khelh 17-ah point thumin an inthlau chhunzawm zel.
Barca hian point 44 neiin, Real hian point 41 nen hmahruaitu team mawngphe an hmu pha.
Athletic Bilbao 0-2 Real Madrid
Ballon d’Or dawngtu Karim Ben-zema chuan Bilbao khuaa San Mames Stadium inkhelah mikhual goal hmahruai hlaplutin, Marco Asensio chhawpsak atanga first half minute 24-a a goal tihluh kha season kal lai inelna hrang hranga Real Madrid tana a goal 12 thunna niin, heti zat goal hi game 18 atanga a khawl ngah a ni a; league match a khelh hnuhnung vawi-ngaah goal khung kim vekin, heti zat khelhah goal ruk a thun zawn a, season kal laiah league goal kua a tilut tling tawh bawk.
-- Advertisement --
French forward goal khat hi Spanish giants-in an duhtawk mai dawn nia a lan hnu last minute-ah Rodrygo thawhrah atangin Toni Kroos chuan chiang deuh zawka Bernabeu club chakna goal a thawh ve leh a; a hma lawka Getafe hnehtu Barcelona-in point ruka an kalsan hman chu point thum bawkin an inkar an pawtzim leh.
Carlo Ancelotti team hi an league match hnuhnungber Villarreal khel-mualah tlawmin, Spanish Super Cup lamah an elpui lian Nou Camp club lakah an chak lo bawk a, boruak rit takin a tlakbuak mek laiin hnehna boruak an hip leh thei a, hmahruaitu team nena an inkar pawh a ngaiin an kaltir thei.
World Cup break zawha league match an khelh tawha chak la nei lo Bilbao-in table-ah pariatna luah chhunzawmin, pathumna Real Sociedad lakah Real Madrid chu point thum chauhin an sang a, January ni 29 khian Bernabeu league match-ah team pahnih hi pathumna luahtu zawk tichiang turin an intawng ang. Sociedad hian Inrinni khan an mikhual Getafe chu goal awm loin an inhnehtawkpui a, Pathianni zanah Real an chak thung si avangin an inkar a fan thui phah hlek.
Hliam avanga France tana nikum World Cup khel thei lo Benzema hi kum 35 mi ni ve tawh mah se club tan goal thun a thulh duh lo a, tunhnaiah international football chawlhsan chungchang thu sawichhuak mah se club lamah erawh level sang bera Real Madrid innghahna lian a la ni kal zel.
Real hian Ningani Copa del Rey quarter-final pakhatah an thenawm Atletico an hmachhawn ang a, Pathianni khian league math pawimawhah Real Sociedad an su zui leh ang.
Barcelona 1-0 Getafe
First half minute 35-a Pedri goal khat thun hmangin La Liga hmahruaitu Barcelona chuan an kawtkaiah point thum an thawkchhuak leh hram a; goal awmchhun khungtu Spain international Pedri khan season kal laiah goal li thun tling chiahin, Xavi team kha tun season league-a vawi 14 an chakna a ni nghal.
Getafe game-ah hremna avangin Barca forward pahnih Robert Lewan-dowski leh Ferran Torres an inlan thei lo a, kum 20 mi Spain forward Ansu Fati chuan an lub tana goal thun hnem ber ni mek Lewandowski hmunruak a luah zo lo kal zel.
Barcelona tan hian France star Ousmane Dembele leh Brazil forward Raphinha-te chuan an hun tha neih goal-ah an chantir zo lo a; nikum nipui thawt laia Leeds United atanga an leichhuah Raphinha hian goal khung thei lo mah se Getafe defence thiatin Pedri goal tur a siamsak thung.
Germany goalkeeper Marc-Andre ter Stegen chuan Barcelona tan a hna tlin taka thawk chhunzawm zelin, tun season league-ah goal ruk chiah a la chhuah a; Pathianni zanah pawh chawlhlawk dawnah Borja Mayoral shot chhe lo tak dansakin, mikhual striker hian Pedri back pass sual nangfuhin chance a nei a, Barca keeper a paltlang zo lo.
Table-a 17-na luahtu Getafe kha goal difference hmangin relegation zone pawn chiahah an la awm thei hram hram ; Nou Camp-ah goal sualchhuak zo lo mah se 2nd half-ah mualneitu team an tihthaih fo.
Barcelona khan leaguea game an khelh hnuhnung vawiriatah tlawm an la pumpelh kal zel a; Nilaini zan Copa del Rey quarter-final match-a Real Sociedad an mikhual hunah chuan hremna tuar zo Lewandowski leh Torres an chhawr thei tawh ang a, an tlarhma pawh hriam sawt tura ngaih a ni.
Hmahruaitu Barca hian league khelh 17-a point 44 neiin, an elpui lian ber leh table-a pahnihna luahtu Real Madrid chu point thum bawkin an kalsan.
Coach Xavi Hernandez chuan Pathianni zanah a regular team siksawi chiamin, a player pawimawh Robert Lewandowski bakah, Ronald Araujo leh Frenkie de Jong an inlan lo a, Copa del Rey quarter-final match atan Araujo leh De Jong hi a khek ve pah niin a lang.
Pathianni inkhel dangah Villarreal pawhin sikhat faiin an mikhual Girona an hneh a; Elche mualah Villarreal chuan 1-1 draw an hlawhchhuak ve bawk.