Barca pan theih loh vanga Europe chhuahsan Messi

Barca pan theih loh vanga Europe chhuahsan Messi
Club-te sum hman theih dan bithliahna Financial Fair Play (FFP) avangin Barcelona chuan an forward hlui Lionel Messi hruaikir leh duh teh mah se an tan tihngaihna a awm lo a, chuvangin Argentina captain pawhin Europe-a khawsak zui duh ta bik loin a club hlui a hmachhawn sek theih lohna tur Major Soccer League club Inter Miami chu free agent ni chungin a zawm dawn ta.
Nilaini khan Argentina forward hian French club Paris St Germain-a a contract pawh-sei a tum loh thu leh Miami pan tura thutlukna a siam fel thu sawi chungin, “Engngemaw hmabak chu la nei bawk mah ila America pan turin thutlukna kan kal-tlangpui ta a ni,” a ti.
Kum 35 mi hian a career-a a vawikhatna atan season tharah hian Europe pawn lamah a inkhel dawn ta a; kum 13 mi lek a nih laia Barca academy-a inziaklut hi Catalan club tana goal thun hnem ber niin, Spanish club tan goal 672 a thun tling.
Argentina legend Lionel Messi hian French champion Paris St-Germain kha season hnih chhungin Ligue 1 title pakhat leh French Super Cup trophy pakhat bawk a lakpui hman a; a contract neih lai pawhsei a tum loh thu hriat a nih rualin Saudi Arabian club Al-Hilal chuan sum tam tak hlawh turin an sawm nghal a; amah hi chuan Barca-a kirleh duh mah se FFP avangin Nou Camp a thleng zo ta lo a, chuvangin US pan mai a thlang ta tih Diario Sport leh Mundo Deportivo chanchinbu a hrilh.
Nikum Qatar rama World Cup trophy pet-chhuaktu hian a career-ah Ballon d’Or award pasarih dawng tling tawhin, kum 30 a pelhna pawh tam ve tawh mah se Europe level sang bera la khel tlaka ngaih a nih laiin Europe chhuahsan a thlang a, tunlaia league ngaihven hlawh ni chho mek Saudi Arabia ram top flight-ah kal ve mai tura ngaih a ni hman thuak a, he league-ah hian Portuguese forward Cristiano Ronaldo pawh Al Nassr thuam inbel chungin a thlengthla tawh a, tunkar mai hian Real Madrid chhuahsanin French striker Karim Benzema pawhin Saudi club dang Al Ittihad a zawm tur thu a puang a, mahse, Messi hi chuan America lam a awn ta zawk a ni.
A club thar tur Inter Miami neitu pakhat zingah England captain hlui David Beckham telin, pop singer Victoria pasal hi European star lian zinga MLS khel tura United States thlengthla hmasaber niin, Los Angeles Galaxy tan MLS Cup vawihnih a lakpui nghe nghe.
Beckham nena thawkdun tura thutlukna khawrpum ta Messi chuan, “European team dangte aTang pawhin sawmna (offer) ka dawng a, mahse, Europe-a ka cham zui dawn a nih chuan Barcelona chiah ka rilruah a awm a, chutih laiin Nou Camp-a kirlehna kawng a ping ta si a, a chi dang deuha football chaih turin MLS lama liamthlak ve hun niah ka pawm hmiah a, am deuh zawka ka nitin nun han chen vete pawh ka duh ve pah bawk a ni.
“A nihna takah chuan mawhphurhna tlanchhiatsan tum pawh ka ni chiah lo a, hnehna chan duhin ka la tuihal reng a, Tha taka khelmuala khawsak pawh ka la duh ngei a, mahse, hahdam deuh zawka hun hman ka duh tih erawh ka zep lo,” tiin eng lai pawha pressure san em em rengna Europe chhuahsan a duh thu a tarlang tel.
Tarlan tawh Thin angin, sum lama harsatna tawk Spanish club chuan kum 2021 khan hlawha insen Teuh ngaihna Messi hi an kawl zui thei ta lo kha a ni a, news conference-ah a mittui dang zo loin Nou Camp a chhuahsan a, PSG a zawm ta a nih kha.
TunTumah pawh Messi hian a hmangaih hmasa Barcelona chu zawm leh duh viau mah se mittui nena a chhuahsan ang boruak kha a tawngbaw leh ang tih a hlau tih sawiin, “Kirleh chu ka duh takzet a, a phur pawh ka phur narawh a, mahse, ka chhuahsan laia ka thiltawn ang kha a thleng nawn leh palh ang tih ka hlau a ni.
“Kei min senglut turin player an hralh Then emaw an player-te hlawh an tihhniam emaw a ngai tih ka hria a, chutiang chu thleng lo se tih hi ka duh a, chutiang zawng zawnga mawhphurtu nih chu ka duh lo,” a ti.
Nilaini khan Barcelona pawhin thuchhuah siam ve nghalin, Messi chuan an ‘offer’ pawm aia Miami pan a thlan tak zawk thu an chhuah a, “Pre-sident (Joan) Laporta pawhin demand leh pressure tlem zawkna league pan tura Messi thutlukna hrethiamin a zahsak a, tunhnai kum engemawti liamta chhung khan a chunga mawhphurhna hi a lo rit rei ve tawh a ni,” tiin.