Bawhzui that loh avangaADB loan tawp hi a pawi
- MNF
ZPM sawrkarin a bawhzui that loh avanga Asian Development Bank atanga loan lak tur sawifel sa vek tawh a zuihral mai chu pawi an tih thu MNF party chuan an sawi.
MNF Policy & Programme Board chu Ningani khan an chairman, MNF senior vice president Dr R Lalthangliana kaihhruaiinan thukhawm a. MNF sawrkar liamta in Mizoram State Health Care Scheme atana ADB atanga soft loan cheng vaibelchhe 1000, kum 2021 atanga a lo buaipui tawh, kum 2022-a Ministry of Finance kaltlanga a chhawlchhin (approved) tawh, ZPM sawrkar hnuaia bawhzui that a nih loh vanga a tawp mai chu pawi an tih thu an sawi
ZPM sawrkar-in Universal Health Care Scheme an kalpui danah, sawrkar hnathawk inzawmkhawm pawl – Federation of Mizoram Government Employees & Workers remtihna telloa Universal Health Care atana an thlatin hlawh cut sak leh, Non Government Hospital Association of Mizoram nen inbiakremna telloa ZPM sawrkarin private hospital rate, sum inhlan chhawn dan system felfai engmah awm loa an barh lui ringawt chu an dem hle tih an sawi bawk.
‘Mizoram pawna hospital changtlungte ‘rate’ tha tak offer an nih lai a, Mizorama private hospital leh kohhran damdawi in pawmpui theih loh system fel lo tak an kalpui hi MNF Policy & Programme Board chuan pawi a ti a. Mipui harsatna tawh nasat zia hria a, sawrkar damdawi in ringawtin mipui mamawhna a phuhruk loh zia hria in, a rang lama inremna siampui tur leh, nu leh pa chan changa dawhkan khat hnuaia inrem pui turin ZPM sawrkar kan phut a ni,’ a ti.