Bayern in record thar an siam

Nilai zana German Bundesliga khelhah champion lai Bayern Munich chuan mikhual an nihna hmunah hnehna an chang a, mualneitu FC Cologne chu 3-1 in an hneh. Bayern hian season laihawla goal an thun ber record an siam a. Season laihawl thlenga point an hmuh tam ber record an nih rual tel bawk.
Season kal meka chetha tak Bayern Munich hian an lenluhna RheinEnergieStadion-ah bul an tan tha lova, goal chhuah hmasa zawkah an tang. Mualneitu FC Cologne tan hian Linton Maina chuan minute 41-naah hmahruaina goal a thun. Goal chhuah hmasa zawk ni mah se Bayern hian si an phur rei lova an si phurh an sut thuai thung. Goal an chhuah atanga rei lo minute 45+5-ah Serge Gnabry goal hmangin an si phurh an sut a, 1-1 a inhnehtawk chungin chawlhawk an hmang.
Chawlhlawk hnu lamah inkhel a hmuhnawm chhunzawm viau naa mikhual team Bayern Munich chan niin, goal hnih ngawt an thun belh thung. Beisei anga goal lut a awm belh theih loh hnuin Kim Min-Jae chuan minute 71-naah an goal hnihna thunin mualneitu FC Cologne lakah hma an hruai let. Hma an hruai let hnuin an Bayern an khel tha chhunzawm a, Lennart Karl chuan minute 84-naah an goal thumna a thun zui leh a, an hmahruaina a tizau. 3-1 a hma an hruai let hnuin goal dang a luh belh tawh lova, Bayern Munich in hnehna changin point thum an hmuh belh.
Bayern Munich hian season kal mekah vawi 17 an khel tling chiah a, khelh hmabak match 17 an la nei. Season laihawl thlengin point 47 an hmu tling tawh a, an hnuai chiaha awm Borussia Dortmund aiin point 11 ngawtin an sang tawh a, champion an hnaih zual deuh deuh zel. Khelh 17 atanga point 47 an hmu hi sason laihawla point an hmuh tam ber 2013-14- season-a an record an nihrual chiah.
Khelh 17 atanga point 47 hmu turin Bayern hian an khingpuite lakah goal 66 zet an thun tling tawh. Hei hi Bundesliga record thar a ni a, Bayern hi Bundesliga-ah season laihawl thlenga goal thun tam ber an ni. 2021-22 season laihawla goal 56 an thun kha season laihawl thlenga goal an thun tam ber a ni thin a, an record hmasa chu goal 10 ngawtin an khum der tawh a ni. Athletic Bilbao chuan kum 1930-31 khan khelh 17 atangin goal 72 zet an thun tling a. Anni hi tun thlengin Europe a league lian zual panga zingah khelh 17 atanga goal 66 chuang thun thei hnuhnung ber an ni a. An chungah hian 1889-90 ah khelh 17 atanga goal 73 thun tling Blackburn Rovers an ni.
Bayern Munich hi German Bundesliga-ah an vawk lal len viau a, an champion ngar nagar a ni deuh chawt mai. Xabi Alonso enkawl Bayer Leverkusen in an champion tluang lai titawp zeuh mah se 2025-26 season-ah an khel tha leh ta viau thung a, dan rual lohin an champion leh ngei dawn niin a lang.