Belgium in hma lam an pan

Thawhtan zana World Cup 2026 khel tur zawnnaah Belgium in Wales an hneh a, World Cup khelh phak an tumnaah hma lam an pan zel. Wales laka an chak tum hian Belgium tan Kevin de Bruyne a vul a, goal hnih a thun.
Group J-ah pahnihnaa awm mek Belgium hi Wales hmachhawn turin Cardiff City Stadium ah an leng lut. An len luhna mualah bul an tan tha lova, goal chhuah hmasa zawkah an tang. Wales hian an mualah bul an tan tha viau a, Joe Rodon chuan minute 8-na lekah hmahruaina goal a thun.
Mualneitu team lakah goal chhuah hma viau mah se Belgium an buai lova, goal thun theihna hun tha an nei thuai a, penalty an hmu. Kevin de Bruyne chuan minute 18-naah penalty pet goal in an si phurh a sut. An si phurh an sut hnuin Belgium an khel tha leh zual a, goal an thun belh thuai. Thomas Meunier chuan minute 24-naah hma an hruai letna goal a thun. Minute 24 chhung lekin goal thum lut hman mah se chawlhlawk hmain goal dang a luh belh thei tawh lova, Belgium in 2-1 a hmahruai chungin chawlhlawk an hmang.
Chawlhlawk hnu lamah in khel a hmuhnawm chhunzawm a, goal thum bawk a luh belh leh. Belgium in a vawi hnih nan penalty an hmu a, Kevin De Bruyne chuan a vawi hnih nan pet goal in minute 76-naah an goal thumna a thun a, an hmahruaina a tizau. An mualah si hniha an hnufual hnuin Wales tan Nathan Broadhead chuan minute 89-naah goal thunin an si phurh a sut then. Sn si phurh sut zawh beisei sang hman viau mah se goal an thun atanga minute khat hnu lekah goal an chhuah zui leh tlat thung. Belgium tan hian Leandro Trossard chuan minute 90-naah an goal lina thunin a tawp a khar a, Wales mualah point thum hlu tak an hmu a, North Macedonia an lehpel ta chiah bawk.
Thawhtan zana inkhel dangah North Macedonia chu an mikhual Kazakhstan nen 1-1 in an inhnehtawk. An mualah an chak zawh loh vangin North Macedonia hian Belgium lakah an hmahruaina an hloh. Belgium hian khelh 6 atangin point 14 an hmu a, khel tlem zawk chungin hma an hruai.