France an chak zo lo

October 13, Thawhtan zan khan Europe khawmual atanga World Cup 2026 khel tur zawnna khelh chhunzawm a ni a, champion tura rinkai zinga mi France an chak zo lo.
Group D-a hma
hruaitu France hi an group-h pathumnaa awm mek Iceland hmachhawn turin Laugardalsvöllur -ah an lenglut. An len luhna mualah beisei angin khel tha lo mah se an chak teuh viau thung a. Hun tawp dawn hnaih lama Kristian Hlynsson goal thun hmangin Iceland an him thei hram chauh.
Team lian lakah tlawm pumpelh a, point hlawhchhuah mamawh Iceland hian an mualah bul an tan tha a, goal thun hmasa zawkah an tang. Inkhel hmuhnawm takah Iceland tan Victor Palsson chuan hmahruaina goal a thun. France in an si phurh sut theihna hun tha nei bawk mah se goal an thun mai thei lova, hnufual zawk ni chungin chawlhlawk an hmang.
Chawlhlawk hnu lamah inkhel a hmuhnawm leh zual a, goal a inlut dawt zut. Second half tantirh lam minute 63-naah Christopher Nkunku chuan goal thunin France si phurh a sut. He goal hian mikhual team a fuih phur viau a, goal thun belh tumin an khingpuite an nawr zui nasa viau bawk. An si phurh an sut atanga minute nga hnu lekah Jean-Philippe Mateta chuan France hmahruai letna goal a thun. Team lian leh chak zawk tura rinkai France in hma an hruai let vangin point thum an hmuh belh ngei a rinawm hman hle.
An mualah ngei dinhmun chhe zawkah ding mah se Iceland an zam mai lova, huaisen takin an mikhualte an nawr let. An si phurh sut ngei tumin thapui an thawh nghal a, an hlawhtling nghal thuai bawk. Si an phurh atanga minute hnih hnu lekah Kristian Hlynsson chuan goal thunin an si phurh a sut. Minute riat chhung leka goal thum a lut hman hian inkhel a tihmuhnawm zual hle a, entute mit a tlai hle.
Hun tawp dawn hnaihah chak tumin team hnihte an innawr tawn nasa hle a, goal thun theihna hun tha nei bawk mah se an chhawr tangkai thei tawh lo ve ve. Hun tawp thlengin goal dang a luh belh thei tawh lova, France chu Iceland lakah chak zo lovin, 2-2 in an inhnehtawk zui ta a ni.
Group D-a inkhel dangah Ukraine chuan 2-1 in Azerbaijan an hneh a, pahnihnaah an inhlangkai. Ukraine tan hian Oleksii Hutsulyak chuan minute 30-naah hmahruaina goal a thun. Hmahruaina goal an thun hnu, chawlhlawk dawn hnaih minute 45+3-ah Vitaliy Mykolenko chuan an lamah ti-goal palhin Azerbaijan si phurh a sut sak.
Group D-ah hian khelh li atanga point 10 hmuin France in hma an hruai chhunzawm. World Cup hnuhnung vawi hniha final khel zawn France dawt chiahah hian point sarih hmuin Ukraine an awm. France draw tu Iceland khan khelh li atanga point li hmuin pathumna an luah a, an hnuai berah Azerbaijan an awm.