Mizoramah Mahindra Bolero leh Bolero Neo thar an tlangzarh

Mizoramah Mahindra Bolero leh Bolero Neo thar an tlangzarh
Mana Motors chuan Mizoramah a rualin Mahindra Bolero leh Bolero Neo thar an tlangzarh a, Mizote mai bakah India rama lirthei hriat hlawh sa tawh a nih avangin an lak luh hmasakte an hralh chhuak leh nghal vek thei dawn tih an sawi. Bolero pangngai chhuak thar hi Mizoramah a man tlawm ber cheng Rs 9,05,837 a ni a, a man to ber Rs 10,89,068 a ni ve thung a, Bolero Neo chhuak thar man to ber cheng nuai 9,70,159 a nih lain a man to ber Rs 11,20,334-in a lei theih a ni.
Thawhlehniah an showroom, Bawngkawnah Asian Armwrestling champion Denic Lalruattluanga leh Mana Motors Dealer Principal Dr Franklin Lalrinngheta’n an khuh hawng a, October ni 6 khan India ramah Mahindra chuan tlangzarh a lo tlangzarh tawh a ni.
2000 khan a vawi khat nan Mahindra-in Bolero a tichhuak a, car an siam chhuah tawh zinga an hralh theih ber pawl ni rengin 2021 khan Bolero Neo an tihchhuak tel bawk a, a vaiin nuai 16 chuang an hralh chhuak tawh a ni.
Mizorama Mahindra full range dealer Mana Motors neitupa Dr Marina chuan, Mizorama motor lar ber sawi dawn ta se Bolero a nih a rin thu a sawi a, “Kawng chhia leh khawpui kawngah hman kawp theih a nih avangin mi tam takin motor tha bera an ngai a ni,” a ti.
Dr Marina chuan, “Bolero hi chu Mizoten an hriat chian sa tawh a nih avangin an duh niin ka hria a, kan lawm hle. A rintlak avangin sorkar pawhin a hmang nasa a. Tunah hian heta awm sa leh Mizoram pana lo kal mek nen 20 chuang chu a zo nghal vek dawn a ni,” a ti.
Hetih lai hian variant hrang hrang zinga a sang ber leh man to ber erawh thla thar atang chauhin an la lut thei dawn niin a sawi bawk.
Bolero hian fak a hlawh hle rualin tunlai car inelna sangah a chhung lam an duan dan duhkhawp lohna a awm fo thin a. Tuna a chhuak tharah hian a hmel tidanglam tam lo mah se, tunlai mil turin a chhung lam erawh a hma aiin an thuam changkang tawh hle a ni.
Infocars hotupa Vanlalmuana chuan, “Bolero pangngaiah hian rawng dum a awm tawh dawn a, a grille thar vuahin a bumper-ah thir an hmang bawk. A chhung an chei nalhin an thuam changkang a, kawng chhia ngam tak chungin khawpui kawngah pawh chuan nuam leh zual tura siam a ni.
“Bolero Neo hi khaw chhunga hman tur deuha siam ni mah se kawng chhiaah pawh a hman tlak hle a. A chhung chei lamah an insawrbing viau a, thiamna dang an bilh tel viau bawk. Mi pasarih thut theihna ve ve a nih laiin a sei zawng metre 4 tling lova siam a ni a, GST tharah a man a tlawm phah hle dawn a ni,” a ti.
Mahindra Bolero hi a pawnlam landanah a cheina an tidanglam deuh a, a grille an refresh a, foglamp thar neiin, 15-inch diamond cut alloy wheels a nei thar bawk. Mahse, LED lighting a la nei lo tlat mai a, a headlight leh foglamp te pawh halogen a ni. Rawng chi thar, Stealth Black an tih chu a awm thar bawk.
A cabin-ah a layout an tidanglam lem lo a, seat cover thar neiin, a cushion an titha sawt bawk a, rectangular touchscreen infotainment display a nei thar bawk. Hei bakah hian steering-mounted audio controls a nei tawh a, Type A USB ports leh Type-C USB port a nei bawk.
Mahindra Bolero Neo pawh hi an update nual a, grille thar neiin, 3D chrome accent leh dark metallic grey 16-inc alloy wheels a nei thar a, rawng chi hnih- Jeans Blue leh Concrete Grey a awm thar a, dual-tone black roof a awm bawk. A model sang N11-in interior shade thar- Lunar Grey a nei a, a model dang zawngin Mocha Brown interior an nei ve thung. A model sang hian leatherette seat cover leh cushioning tha zawk neiin, thut vel pawh nuam zawk tura ngaih a ni a, 9-inch touchscreen, Type-C USB port le reverse camera a nei ta bawk.
A mechanical-ah tihdanglam a awm lo va, Bolero hian 1.5-litre three-cylinder diesel engine, 74bhp leh 210Nm torque pechhuak thei neiin, Bolero Neo hian 1.5-litre mHawk100 motor, 99 bhp leh 260 Nm torque pechhuak thei a ni a, 5-speed manual transmission ve ve an ni bawk.