Bengal CM tura rin Adhikari-a PA kap hlum, mi pathum man

Bengal CM tura rin Adhikari-a PA kap hlum, mi pathum man
BJP hruaitu, Suvendu Adhikari-a personal assistant Chandranath Rath-a thah chungchangah hian mi pathum vel thu zawh fiah turin man an ni tih thuneituin a sawi.
Police hotu pakhat chuan, “Chhui hna kalpui mek a ni a, mi thenkhat chu thu zawh fiah an ni,” a ti.
BJP kaihhruai sorkara West Bengal chief minister ni tura rinkai ber, Adhikari-a hian tun hnai lawka inthlanah khan South Kolkata-a a lenna, Bhabanipur-ah Chief Minister Mamata Banerjee-i a hneh.
Rath-a hi kum nga vel Adhikari-a PA a ni tawh a, a puitu hnai tak a ni a, Nandigram leh Bhabanipur-a Adhikari-a’n inthlan a chuh a chet laknaah pawh a thawhhlawk hle a, bial hnihah hian an tling ve ve.
BJP hruaitu pakhat chuan, “Union Home Minister Amit Shah-a pawh hriattir a ni tawh,” a ti.
Nilaini zan dar 10:15 vel khan North 24 Parganas-a Madhyamgram-a a chenna in pana a haw lam chu motorcycle-a chuang tu tih hriat lohten hnai tak atangin Rath-a hi an kap a. Thil thleng hmutute chuan Rath-a lirthei hi car hmanga lo dan a ni a, car hi a hnuah hnutchhiahin motorcycle hmangin a titute hi an tlanchhia niin an sawi.
“Mi pathum, helmet khumten Doharia-a packaging unit bul thim laiah motorcycle pahnih nen an lo nghak a, Rath-a Scorpio dum a lo thlen chuan lirthei dang (Nissan Micra hatchback)-in a sir lehlamah a rawn hnaih a, kawngpui a dang a, an pathum hian lane atanga chhuakin Rath-a lirthei chu an kap a, chumi hnuah car hnutchhiahin motorcycle-in lehlam lehlam hawiin an tlanchhe zui a ni,” tiin tual chhung mi pakhat chuan chanchinbu mite a hrilh.
Chhuinaah chuan an lo danna lirthei number leh a chassis number chu tihdanglam a ni tih hmuh a ni a. He number hi Siliguri-a ziah luh a ni a, Siliguri police chuan number plate hi Siliguri-a cheng, William Joseph-a ta lirthei dang a nih thu an hre tawh.
“Lirthei hman hi ka ta a ni lo. Licence plate-a number an hman erawh ka number a ni a. Thla eng emaw zat kalta khan online platform-ah ka car hi hralh turin ka dah a, police-ten ka car leh document-te nen police station-ah min lo va, zawhna tlem min zawt a ni,” tiin thingpui siamnaa thawk, Joseph-a chuan chanchinbu mite a hrilh.
“Tun thlenga police-ten an hmuh danah ruahmanna tha tak siama thisen chhuahna a ni. Mi thattute hian ni hnih thum kalta chhung khan an lo buaipui tawh a, number plate dik lo an hmang bawk,” tiin Adhikari-a chuan chanchinbute a hrilh.
Rath-a lirthei khalhtu, Budddadeb Bera-a chu silaimu pathumin fuhin a na hle a, a hnunga thu, BJP worker pathum chu hliam tuar lovin an tlan chhuak nia sawi a ni.
Nilaini zan khan state police-a hotu lawk te chu Director General of Police (DGP) Siddh Nath Gupta-a hovin an thleng nghal a, CID hotute leh forensic thiamte pawh zingah an thleng.
Sample, seat cover-a thisen leh kartut te an la a. CCTV footage te chu an zirchiang mek bawk.
Bengal-ah hian tun hnai inthlanah Adhikari-a hovin BJP-in hnehna changin Trinamool Congress an paih thla a. Chief Minister Bannerjee-i chuan an tlawm lova, thil dik loh tak tam a awm nia sawiin boruak pawh a sosang hle a. Inthlan result chhuah hnuah politic kaihhnawih thihna thleng panga vel awm tawha hriat a ni.