Bengaluru atangin iPhone thawn chhuak thei tep
Taiwanese electronics siamtu lian, Foxconn chuan Bengaluru-a an hmuna an thil siam an tlangzarh thei tep tawh a, iPhone-te chu June thla tirah an thawn chhuah hman a rinawm niin Karnataka Commerce & Industries Minister MB Patil-a’n a sawi.
Ramin ‘India-a siam’ tih thupui a neih chu a hlawktling tih sawiin tech giant Apple chuan kum tharah hian US-a thawn tur iPhone remkhawm zawng zawng India-a sawn a tum hnai tih a sawi.
Patil-a chuan, “Foxconn-in Devanahalli ITIR-a an hmuna an thil siamte chu tlangzarh turin peih a ni tawh a, iPhone thnawn chhuah hi June thla tirah tih theih a nih a beiseiawm,” a ti.
X-ah he thil hi thil siam chhuahnaa mel lung thar mai a nih loh thu pawh tar langin, “Kal dan thlak lantirna a ni a. Ram inelna leh tariff avanga inepna sang karah India chu Apple-in an thil siam chhuahna atana an duh a ni a. Hei hian Karnataka pawh khawvel puma thil siamnaah leh ram dangin sum an rawn invest-naah a tisang dawn a ni,” a ti.
Apple CEO Tim Cook chuan June chawlhkar thumna velah chuan US-a iPhone zawrhte chu India-a siam vek a ni tawh dawn niin a sawi.
“Kannadiga tan ni chhuanawm a ni a. Mysuru atanga Cupertino thlengin, Karnataka chu khawvel pumah ngaihven a ni dawn,” tiin Patil-a chuan a sawi.
Union Electronics & Information Technology Minister Ashwini Vaishnaw-a pawhin India chuan ‘India-a siam’ tih chu khawvel huapin a hlawhtling tih a sawi ve bawk.
Apple-in India-a an thil siam chhuahna tur hi an tipung mek zel a. Foxconn-in Bengaluru-a an hmun thar hi a nih dan tur pangngai a nih hunah chuan iPhone maktaduai 20 thleng an siam thei dawn a ni.
Nikum khan India-ah hian $ tluklehdingawn 22 man hu iPhone rem khawm a ni a, Tamil Nadu-a Foxconn chu Apple-in an thawn chhuah 50% dawn tumtu a ni.
Tunah hian Apple-in khawvel puma iPhone an siam chhuah 20% dawn chu India-a siam a ni a, an brand hian huang zauh zel pawh an la tum.
Kumin thla thum chhungin iPhone maktaduai thum chuang India atanga thawn chhuah a ni tawh a, a tam ber tum a ni.
Bengaluru atangin iPhone thawn chhuak thei tep
Get real time updates directly on you device, subscribe now.
Next Post