“Ber” thla, Beihrual thla

September atanga December thleng hian Zofate tan chuan “Ber”
thla a ni a, hun nuam, hun nghahhlelhawm a ni. “Ber” thla hmasa ber hi Beihrual thla a ni a, Zoram Kristiante tan hun pawimawh a ni.
Tun hma deuh, 90s vel thleng kha a ni ang, Aizawla ni tin chhuak chanchinbu September thla issue hmasa berah “Kan ti nek nek a, ‘ber’ thla kan lo thleng leh ta der mai,” tih an ziak thin a, “Ber” thla a intan tih an hre vek chungin “news” a tling a ni ang, chanchinbu-ah an ziak tho. Social media-ah pawh a lar zui a, “Ber” thla chungchang hi a lung tileng zawng te leh a hlimawm zawng tein an post sup sup thin.
“Ber” thla hmasa ber hi Beihrual thla a ni a, Kohhranhote zan tin an inkhawm thin. Mahse Beihrual hi a tirah chuan September-ah an hmang lo.
Beihrual thla hi 1918 June thla atanga hman a ni; 1906-ah harhna hmasa ber a thleng a, 1913-ah harhna a thleng leh a, ringtu an pung chak hle. Mahse, harhna chu a lo reh a, ringtute an lo harh lo ta deuh a, khawvel lama let leh ta te an awm a ni awm e. “Pathian thu awih leh aichhia chuan thal an hua a nia,” tiin ring lote’n an chhaih nawmnah thin.
Chung lai chuan Mizoram Hmar chan hi Khasi Synod hnuaia Presbytery pakhat a ni a, March leh October-ah inkhawmpui an nei thin. March ni 15-18, 1918 Presbytery Inkhawmpui, ‘Aijal’-a neih chuan tiang hian an rel ta a: “Kristian Beihrual-na hi June, 1918 a hian lo awm tan turin kan ruat a. Thla chawhma lam chu mahni Kohhran ho tan a, in tih chak na tur leh in tih thianghlimna leh in tih ngah lawk na atan kan hmang theuh ang a, tin, thla chawhnu lam chu ringlo te tan a hman tur ani ang, mi hruai hram turin. Tin, Kohhran tin in an thawh-zia dan theuh tur an ngaihtuah ang,” tiin.
Beihrual-ah chuan ringtute’n ring lote veiin Pathian thu an hril a, a hlawk hle. Khaw hrang hrangah Beihrual vanga hming pe thar mi 344 an awm.
June 1918-ah hlawhtling taka an hman avangin October 1918-a Champhai Hmunhmeltha khuaa Presbytery chuan, “Beihrualna hi awm leh sela kan ti tlang a, kum 1919 September a ni ang, a tih dan tur chu hmana mi ang bawk khan a ni ang,” tiin an rel a, 1919 chu harhna tum thumna thlen kum a ni ta nghe nghe.
1918-ah June thlaah an hmang a, 1919 leh 1920-ah September-ah, 1921-ah January-ah ,1922-1924 chhungin April-ah, 1925 atangin mumal takin September thlaah an hmang ta nia hriat a ni.
Presbyterian Kohhran bakah Kohhran dang pawhin Beihrual hi an hmang ta zel a, kum chawhnu lam- Krismas rim nam tan hun a ni bawk nen, September chu Mizo Kristiante tan hun pawimawh a lo ni ta. Kuminah pawh kohhran pawl hrang hrangin Beihrual hi an hmang.