Bial vil tur hi kan zavaia duh tlan a ni – ZPM leader

Bial vil tur hi kan zavaia
duh tlan a ni – ZPM leader
MLA inthlanpui neih tura thlira ZPM party-in bial vil tur an ruat danah rawn ngai nia an hriat an rawn kim a, an zavaia duh tlan hlirin thuthlukna an siam tih ZPM leader Lalduhoma chuan a sawi.
Thawhtannia an party office-a inkhawmah ZPM leader chuan tunhnaia an party-in 2023 inthlanpui awm tura bial viltu a ruat dan a sawifiah a. Bial viltu tur thlithlaiin hun engemawchen atang tawh khan Search Committee an din a, an theih ang anga hma an lak hnuah nikum November khan office bearer-te chuan Search Committee hian bial viltu tur ruat theihna nei rawh se, tiin a rawt a. Kumin January-ah hemi chungchangah hian inrawnkhawmin, bial vil tur chungchangah rawn theih leh rawn ngai nia hriat zawng zawng an rawn kim tih a sawi.
“Hemi hnu hian rawtna awm angin Search Committee chu Nomination Committee-ah rin zui nise, tiin lungrual takin kan pawm a. Meeting hrang hrang kan neihah a tam zawk duh danin thutlukna kan siam a ni mai loa, kan zavaia duh tlan, 100% hlirin thutukna kan la siam,” a ti.
An miten sawrkarna siam loh an hlau tawh a, tlin ngei an duh ve tawh avangin candidate ruat chungchangah pawh ngaihdan hrang hrang a awm phah lo thei lo tih Lalduhoma hian a sawi a. ZPM-ah mithiam leh mitha tak tak an luh reng avangin bial insem chungchangah pawh harsatna an tawk lo thei lo tih a sawi. “Mimal tan kan ding loa, kan ram tan policy-ah kan ding reng dawn. ZPM hi Pathianin min kaihruai a, sawrkar lai pawhin a ngam loh kan ni mek tawh a, hmalam kan pan zel ang,” a ti.
DIET hnathawk Group A leh B ten hlawh an lak theih loh avanga hna an kal ta lo chu pawi an tih thu ZPM hruaitu hian sawiin, hei hian nasa takin zirna lamah nghawng a neih dawn avangin sawrkarin a rang thei ang berin an harsatna chingfel turin an phut tih a sawi bawk.