Bialtu MLA-in transformer leisak

Lunglei North bialtu MLA, High Powered Committee (HPC) vice chairman V Malsawmtluanga chuan Inrinni khan a bial chhung Zote South khawtlang tan transformer 250kVA a hlan.
Zote South hian transformer 100kVA an hman mek chu a chhiat avangin kumin September 15 zan atang khan power supply an nei tawh loa, bialtu MLA hian theihtawp chhuaha hma la nghalin, khawtlangin an duhthusam ang transformer hmu tur chuan hun a duh rei deuh dawn avangin MLA fund-a rulh leh turin transformer 250kVA hi a leisak a ni.
Inrinni vek khan V Malsawmtluanga hian Zote South-ah hian mipuiin an mamawh an thlen theihna (public interview) hun hawngin, khawtlang hruaitute chuan bialtu MLA-in an khawtlang mamawh transformer a pek avang leh khawtlang mipuiin office-a pan ngai loa an khuaah ngei kalchilha an harsatna leh mamawh thlenna hun a hawnsak avangin lawmawm an tih thu an sawi a ni.